لا فرق بين عربي وأعجمي… لتربية الطفل

شحالكن يميع عساكن بخير ونعمه يااارب ^^

انا عندي مشكله او بالاحرى عند اخويه بس احسها مشكلتي >> كيفي ^^

طبعا كلكم تعرفون حديث رسول الله (ص) اللي يقول فيه :
<لا فرق بين عربي واعجمي الا بالتقوى >

بس بصراحه منو منا يطبق هالشي
يعني انا مثلا من انولدت وانا اسمع هالحديث من اهلي (ابويه وامايه اكثر شي ) ويوصوني دووم يوم اسير المدرسه اني اعامل الكل شرا خواتي وما احسس حد بالفرق بيني وبينه سواء من حيث القبيله ولا النسب ولا اللون ولا اصلي ومب اصلي طبعا انتوا فاهمين شو اقصد

ويوصون اخواني وانه نحن ما نكون عنصريين الين ما رسخوا هالشي بتفكيرنا وصرنا فعلا نتعامل ويا الكل فبلادنا الحبيبه وكانهم منا تماما او من نفس قبيلتنا يعني ما شي فرق .

الين هني الامور تمام والحمد لله ما شين على نفس القيم والمبادئ

وين المشكله ؟؟

المشكله ياخوات انه اخويه شاف وحده عيميه وحبها وبنت زينه واهلها ما عليهم كلام

وانا تعرفت عليها وصراحه اخلاقها توووب ولا شفت منها الا كل خير ونعم فيها
بس اهلي يوم عرفو انه البنت عيميه ماوافقوووووووو وقالو حق اخويه اعتبر الموضوع منتهي ولا عاد ترمس فيه ولا تناقشنا

عيل شو هالتناقض وين الكلام والوصايا كل شي كان كلام عالفاضي ؟؟

طبعا ناقشهم اخويه انه انتوا دايما توصونا عالناس وجيه شقايل تغيرون رايكم وتقولون ما لا تفعلون خخخخ

كان جوابهم انه نوصيكم عالناس وتعاملكم وياهم من بعيد بس يعني زواج لا وحتى لو نحن وافقنا شو بيقولون باقي العايله ؟؟

صراحه انصدمنا كلنا (اخواني يعني وانا )
المشكله باخويه الحينه يبا البنيه وميت عليها ولا يبا يتنازل عن رغبته وثاني شي ما يبا يزعل اهلي منه

فبرايكم شو الحل ؟؟

انا بصراحه ضد فكرة اهلي المفاجأه وقرارهم الغير متوقع
وابا اساعد اخويه ومب قادره لان اهلي سكروا اي باب للنقاش بهالموضوع