ريلي ذبحني بعدم ترتيبه لاغراضه
صرت اكره ادخل الغرفه بسبت هالشي
سافر 3من ايام و والله العظيم اني لين الحين ارتب بس في الغرفه من كثر اغراضه المفروره مني ومناك (عندي شغاله بس ماحبها ترتب غرفتي)
تخيلوووووو
عندي سله حق ملابس الغسيل
اول مرة حطيتها فالممر الصغير اللي عدال الحمام …..
وكنت انصدم فيه يظهر من الحمام ويرمي ثيابه ورا باب الغرفه!!!!!!!!!!!!
كلمته وقال لي حطيه هني!! وعشانه حطيته ورا الباب رغم ان المكان غلط
يوم حطيته ورا الباب قام يرميهم عدال الكبت!!!!!!!!!!!!!
رديت حطيت السله مابين الكبت والجدار
ورد يرميهم عدال الحمام (المكان اللي كانت فيه السله اول مره)
يعني دوم جيه كل ما احط السله في مكان يفر ثيابه في مكان ثاني اونه مكان السله غلط!!!!!
غير جيه يرد من الدوام يفر دريسه في اي زاويه تعجبه فالغرفه ولما اشله واعلطه على المعلاق ينش الصبح معصب !!!
حتى منشفته كل يوم فارنها في مكان ولما ارد واحطها على رف المناشف اللي في الحمام يرد ويطلعها ويفرها في اي مكان وفي اي زاويه من الغرفه (عادي حتى عالارض ترى!!!)
تخيلوووو لدرجة وصلت مرة اني فتحت كبته وتميت ارتب ثيابه لانها قممممه العفسه شو لقيييييييييييييييييت!!!!!! لقيت وزارين و4 فنايل متخيسه بين الثياب!!!!!!!!!!
رغم ان زوجي وايد نظييييف يعني يسبح فاليوم 3 او 4 مرات ويغير ملابسه وااايد ويهتم وايد بنظافته الشخصيه وريحته
بس مادري ليش يسوي هالحركات!!!!!!!!!!!
حتى اوراقه يفرفرهن في كل مكان
عالتسريحه
عالكومودينو
عالتلفزيون
عالبرنتر عالمكتب
عالسرير
عالارض!!
عالكرسي
ولما احطهن داخل الدرج في الكومودينو يعصببب!!!
والتسريحه !! آآآآآآآآآآآآآآآآه من التسريحه !!!!
تووووني ارتبها ماتمر عليها 3 دقايق الا كل الاشيا اللي فالدرج القاها فوق!! والعطور معفوسه والمشط مرمي فوق والكريمات والاوراق آآآآآآآآآآآآآآآآآآه آآآآآآه بصيح
هذا غير عشق زوجي للالكترونيات والوايرااات
وايرات ومحولات كهربا في كل مكان
اما عاد غرفة الجلوس حدثي ولا حرج!!!!!!!!!
ياااااااااااااااااكثر الوايرات
هذا الواير اللي يشبك اللابتوب بالتي في
وهذا الواير اللي يشبك الريسيفر بالانترنت
وهذا واير ثاني يشبك اللابتوب بالتي في عشان الصوت
و مليون واير احتياط للتجارب!!!
وملابس مرميه هني وهناك
واوراق وكتب مفرورة
وسي ديهات وافلام يااااكثرها ومايباني ارتبها فالادراج حق المكتبه (لانها ماتكفي بالمكان المخصص للافلام اللي فالمكتبه من كثرها)
والله حليلها الخدامه كل يوم ترتب هالغرفة وتنظفها بس ريلي يقولها ماتلمس اغراضه (الوايرات – الاوراق – الافلام حتى ملابسه!!!)
تعبت نفسيا واالله تعبت
المشكله الحين عندي ولدي عمره شهرين وماقدر اتم الاحق ريلي ولا ولدي!!!!
تخيلو يوم ربيت ورحت بيت اهلي فالاربعين
يوم رديت والله العظيم بغيت اصيح
حسيت اني دخلت زريبه مب بيت
والله العظيم لين الحين وانا ارتب آثار غيابي عن البيت!!!!!
ولما اكلمه يضحك ويطنشني ويسوي عمره ماسمع!!!
كنت في بيت اهلي غرفتي احلى وارتب غرفه
كانت دووووووووم مرتبه ومنظمه ومبخره محلاها كلهم يحبون يدخلونها
حتى اختي يوم ربيعاتها يزورونها تدخلهم غرفتي وتقص عليهم اونها غرفتها!!
والحين!!!!!!!!!!!! بصييييييييييييييييييح واالللللله
مب عارفه شو اسوي
صرت اكرره ارتب الغرفه لاني اعرف ان هاتعب كله ما منه فايده
بس يحط زوجي ريوله فالغرفه الا هي معفوسه فوق تحت!!!!!!!!!
والحين عاد بننتقل بيت اكبر
بس غرفتنا بتكون اصغر شويه عن هالبيت
ومابا يستويبي جيه
مابا انصدم لاني حاطه آآآآماااال وايد على هالبيت لانه وايد حلو
دخييييلكم انصحوني شسوي وكيف ارتب وكيف اخليه ينظم اغراضه بأي طرييييقه ممكنه
لاني فعلا كرهت غرفتي وكرهت بيتي كامل
وابي لما انتقل احب بيتي اللي من الحين حبيته لانه عاااجبني حلو ومرتب بس!!! لا يحبطني ريلي
سمحولي طولت وايد فالرمسه بس صدق طفرانه وابي افضفض
خليها معفسه صح بتتعبين نفسيا" فالبدايه..بس تحملي لين ما يلاحظ ان الغرفه مب مرتبه ويمكن يعدل من طبعه شوي..
ولو ان بوطبيع ما يوز عن طبعه..
بس ماقدرت اتحمل قمت ارتب مع اني تعبانه والله بس ماتحملت اشوف البيت معفوس
يوم دخل وشاف البيت مرتب قال (اللللله محلا النظافه والترتيب تفتح نفس الواحد يدخل بيته)
قلت له طيب ليييييييييييييش تعفسه اذا تحب تشوفه مرتب!!!
قال وهو يضحك اونه يمزح وياي (حبيبتي انا ريلج حبيبج اللي يعفس وانتي حرمتي حبيبتي اللي ترتب… اذا انا ماعفست انتي شو بترتبين)!!!
شفتو القهر !!!
احسه يتصرف شرات اليهال ياهل ,,
..
شوفي فكره حرمت أخويه وايد حلوة ,,
قوليله إذا فريت الملابسك ع الأرض تدفع ريال وطبعا في الحصالة يحطيها .. خخ يتأدبوووا
وعوديه على النظافة ..
والله يهديه
صارحيه عرفي منه الاسباب .,.
حسسيه انج متضايقه منه ومن تصرفاته
ههههههههههههههههههههههههههههه
والله حلوة…كانه يقولج تراني مسوي لج شغله تتسلين بها ، ناقص تشكرينه بس …!! الله لا يبتلينا
شوفي دايما يقولج الشخص الفوضوي يعبر عن شخصية فوضوية وعادة ماتميل الى اللاترتيب حتى لو حاول الاشخاص المحيطين اتباع سلوك معين في نهج اسلوب لحب الترتيب ,,,انا اعتقد ان ريلج يستمتع بحياة على هذه الطريقة يمكن هو في داخله يحس في وجودج بشكل مادي …يعني اقصد بالصورة الي انتي تحاولين فيها تتبعينه في كل تحركاته عشان ترتبين و تنتظفين من وراه … يدخل البيت ويشوفج في كل زاوية وركن ودرج (مرتب ومنظم ) وكانه يبحث عنج من جديد ويحاول يعفس كل شئ بكل فوضوية يعني تقدرين اتقولين استمتاع …مثل اللعبة تمرد ، بحث ، ايجادك ، وتنعاد الكره ، انا شخصيا كنت اكتئب بعمق اذا دخلت غرفة اخواني وكنت اكره انظف او ارتب او انظم اي شئ يخصهم لان اعرف ان مصيره ينقلب وأسوا عن قبل ..بس اتبعت معاهم تظام واقسمت عليه ان راح يطبق لا محال ومافي رأفه بالموضوع لان احس لو شخص معاق مابيتصرفون بهذه الهمجية و الفوضوية والكسل مثلهم … انا حطيت سلة الغسل جدام عيونهم بنص الغرفة وقلت لهم لو واحد منكم غير ملابسه وماكلف نفسها يحطها في هذه السلة و الله ماباخذ اي لبس متناثر اهني ولا هناك و فعلا لاني كنت منفعله خذوا كلامي بجدية بعد ما قرفت من تصرفاهم هذه وصارت كل الملابس في السلة والي يتهاود ويرمي هني وهناك ما اخذها ولا اغسلها …بس هالاسلوب ريحني ..يمكن من ناحية الملابس لان عارفين اذا الكبت فضى من ملابسه مابيحصلون اي شئ يلبسونه ساعتها بيعلنون حالة طوارئ ..
وما اتوقع ان ترتيب الرفة من عدمها يفرق مع ريلج يمكن هو يعتبر الحالتين سيان لان عارف ان بعد العاصفة الي راح يسببها كل شئ بيرجع طبيعي وفي مكانه و احسن بعد من فضلج ومجهودج طبعا ً …بس مادري اذا اتبعتي اسلوب التهديد مثل ما سويت مع اخواني بيفيد معاه او لا …بيحس او لا … جربي وشوفي يمكن اذا تعب ساعتها راح يفكر يتحسن شوي شوي وخليج اقوى يعني لا تقولين خلاص بترك الترتيب وبصير مثل طبعه لان لازم واحد يأثر على الثاني و ان شاء الله بيتغير ……..وان كان الامل ضعيف لان مشكلة ريلج اعتقد انها في كل بيت وللاسف 