.gif "13 (30)")
.gif "55 (11)")
.gif "55 (8)")
السلام عليكم ورحمة الله وبركاته خواتي وغالياتي
بما أني اتعودت أنكن اتشاركنيه بقصص ولاداتي
حبيت اليوم أنيه أكتب لكن قصة ولادتيه الثالثة
وقبل لا أكتبها لكن
حبيت أحط الروابط التالية
للخوات اللي ايحبن ايعرفن قصة ولادتي بغاليتي ميثاء
وهالرابط فيه قصة ولادتي بحبيبي محمد
الحمدلله رب العالمين .. كملت الـ 9 شهور من الحمل على خير
وصارت مريومة الصغيرة عضوة في عايلتنا الحلوة
+++ اتفضلن غالياتي اقرن قصة ولادتيه الثالثة +++
الحمدلله رب العالمين اللي وهبنا الصغيرة مريم
يوم الأربعاء .. تاريخ 27/04/2017 .. الساعة 05:54 الصبح
عسى الله يحفظها ويحفظ أختها وأخوها وأبوهم وايخليهم لي
خواتي الغاليات
قبل لا أكتب لكن عن أحداث يوم الولادة
حبيت أنكن اتعرفن أني هالمرة .. عانيت قبل الولادة بسبب التعب اللي كنت أحس به كل مرة
وفنفس الوقت .. تكون تجربتيه درس لكل وحدة أنها لا تستعيل ولا تعتمد على كلام الدكاترة دوم
أسبوعين قبل الولادة .. سايرة الطواري .. وكل مرة يشوفون أنيه تعبانة
يفحصوني .. لكن يكررون نفس الجملة
"الياهل ما نزل في الحوض"
وأنا كل مرة أحس بالإحباط
تميت على هالحال .. سايرة رادة
لين آخر مرة وكنت في الأسبوع 38+
أصريت عليهم أنه قبل لا يفحصون أو يسوون لي تخطيط الطلق
أنهم يشوفون الياهل بالسونار ويتطمنون على وضعيته
وهنيه كانت الصدمة
الياهل انجلب والراس صار فوق
طبعاً اتفاجأت
لكن قلت الحمدلله على كل حال
وحمدت ربي اللي ألهمني أني أطلب من الدكتورة تشوف لي وضعية البيبي بالسونار
عقبها الدكتورة طلبت أنيه أسوي تخطيط للطلق
وطلع عندي طلق
وبالتالي أصرت علي أنيه أتنوم في المستشفى
لأنها خلاص الولادة بتكون قيصرية
أنا رفضت .. وقلت مستحيل أنيه أستعيل
وهي تنصحني بالقيصرية ومصرة على رايها
وفنفس الوقت تخوفني أنه ماشي أمل أنه الراس ينزل
لأنه خلاص ما باقي لي شي في الشهر التاسع غير أسبوع تقريبا
وقالت لا سمح الله لو تميت أعاند .. المشيمة ممكن تنفصل عن الجنين وقت الولادة
أو أنه الياهل بيختنق وقت الولادة
أو أني بتم أعاني من كل آلام الطلق وآخر شي بيحولوني للولادة القيصرية
بس أنا تميت معاندة ورفضت أنيه أتنوم .. وقررت أنيه أتوكل على رب العالمين .. هو أدرى بعباده
وريلي نفس الشي .. رفض الموضوع وأصر أننا نرد البيت
وقعنا أنا وريلي على مسؤوليتنا وظهرنا من المستشفى
قضيت الليل أدعي رب العالمين أنه يسهل علي ويكتب لي اللي فيه الخير
وكنت مقررة أنه أول ما يطلع الصبح .. بإذن الله بسير مجمع الشنار الطبي عند الدكتورة زينب
الصبح على طول سرت للدكتورة زينب
واللي يزاها الله كل خير دنيا وآخرة .. خلال 10 دقايق جلبت لي راس الياهل
صدق لو بتم أدعي لها من اليوم لين آخر يوم فحياتي
ما بوفيها حقها .. لأنها إنسانة رائعة بكل معنى الكلمة
الدكتورة اتأكدت أنه كل شي تمام
وطلبت أنيه أراجعها عقب يومين عشان تتطمن على وضعية الجنين
راجعتها والحمدلله كل شي كان أوكي
في الأسبوع الأخير من الشهر التاسع
حسيت بويع يروح ويرد
سرت الطواري .. وقالوا لي 2 سم لكن الياهل راسه بعيد
يومين وأنا على هالحال
وبتاريخ 26/04/2017 .. طلبت منهم يعطوني محرض على الطلق
لأنه خلاص تاريخ 27 بيكون آخر يوم لي في التاسع .. وأنا خلاص صدق تعبت
لكن الدكتورة الموجودة نصحتني وقالت لي الأحسن أنها تسوي لي توسعة خفيفة
وطلبت مني عقبها أرد البيت
وإذا ما زاد علي الويع
أرد المستشفى بتاريخ 28/04/2017 عشان يعطوني طلق صناعي
رديت البيت
لكن العصر زاد علي الويع بشكل فظيييييع .. وتميت متحملة
والمغرب سرت بيت أهل ريلي ويلست لين الساعة 11 .. وأنا أحس بالويع يزيد أكثر وأكثر
رديت البيت .. وتميت لين الساعة 1 .. وعقب قلت حق ريلي خلاص مب متحملة
وصلت المستشفى .. ونفسها الدكتورة اللي سوت لي التوسعة كانت موجودة
فحصتنيه وقالت 5 سم ويالله على الولادة
ريلي على طول اتصل بأمه وخبرها أنهم بيدخلونيه الولادة
وطلب أنها هي ويدته اييون لقسم الولادة
وأنا اتصلت بختيه الصغيرة وخبرتها لأنها محلفتنيه أخبرها
دخلونيه غرفة الولادة
ووصلن أم ريلي ويدته ربي يطول لي بعمارهن
لأنهن هن دوم يكونن ويايه في غرفة الولادة بما أنها أمايه فديتها كالعادة .. ما تعرف إلا عقب ما أولد
يدة ريلي فديتها تمت تمسح على ظهريه
وتقرا لي قرآن وتدعي لي بسهولة الولادة طول ما هي يالسة عدالي
وأم ريلي فديتها .. تمسح على ظهريه وتيود ايدي عشان اتخفف علي
وريلي ربي يحفظه كل ما أيود الأكسجين عشان أتنفسه
يعرف أنه الويع قوي .. فيعطينيه ايده وأنا أرص وأرص ولا هامنيه شي
لأنها القابلة ما عطتني إبرة مسكنة هالمرة
وقالت لي يوم اتحسين بويع .. اتنفسي وخذي شهيق وزفير وحطي الأكسجين إذا زاد عليج الويع
ويوم وصلت 8 سم .. طلبت القابلة من الكل يظهر لأنها بغت تفتح لي كيس الماي
الحمدلله يا رب وكالعادة .. أنا بدال لا أصارخ وقت الولادة .. تميت أردد " ياااااااا رب" كل ما ايزيد الويع
والحمدلله دعيت لكل أمة الإسلام ولكل واحد وصاني
وأنا أطلق .. سمعت صوت المؤذن وقت الفجر .. يقول الله أكبر
سبحان الله .. اتذكرت يوم ولادة ولدي
لأني يومها سمعت المؤذن يقول الله أكبر لأذان المغرب
وقبل لا يخلص الأذان انولد حبيبي محمد
المهم خواتي
أنا كل ما يزيد عندي الطلق .. أقول يااااا رب .. ياااااا رب
تميت أدفع وأدفع وأنا كاتمة صراخي وأردد "يااااا رب سهل علي"
والقابلات يقولن يالله شوي وبتخلصين
والحمدلله .. ظهرت مريم ونورت هالدنيا بوصولها
وريلي ربي يحفظه صور لحظة وصول البيبي بالفيديو وصور كل شي في الغرفة
عقبها ظهر على طول يبشر أمايه وأختي والأهل
وأنا تميت أردد
الحمدلله على نعمة الولادة الطبيعية
الحمدلله أننا ما استعيلنا أنا وريلي يوم عرفنا أنه راس الياهل فوق
الحمدلله أنه سهل علي وأنعم علي بولادة طبيعية
أخيرا حبيباتي
دعواتكن الطيبة
أنه رب العالمين يحفظ لي ميثاء ومحمد ومريم
وايكونون من الذرية الصالحة
ويحفظ لنا أبوهم وايطول لنا بعمره
آااااااااااااااااااااااامين يا رب
السلام عليكم ..
لا إله إلا الله ..
تبـــــــــــــــاركـ الرحمن الحمدلله ع السلامه والله يحفظلج ميثاء ومحمد ومريــم ويجعلهم ربي من الذريه الصالحه في الدنيـــا والله يرزقج برهمـــمـ ..
فمـــــــان الله
كم مرة تبين تصيحيني؟؟؟
وااااااااااااااي قلبي يوم شفت الفيديو
تتربى بعزكم يا رب.. والله يخليها ذخر لكم وللأمة الإسلامية..
وما شاء الله عليها.. قمممممممممممممممممممممر
أحلى عن ميثوه.. هههههههههههههه
وعقبال القصة الرابعة.. شكلي بنفلع.. صح؟؟ ههههههههههههه
هههههه
الحمدلله ع سلامتج الغاليه
ومبرووووك عليكم البنوته الحلوه
الحمدلله ع سلامتج الغاليه
ومبرووووك عليكم البنوته الحلوه
الحمدالله على سلامتج وسلامة البنوتة
ما شاء الله عليج وربي يحفظج ويحفظ عيالج
الحمدالله ع سلآمج
مبرووووك…
وتتربى بعزكم..
الحمدلله عسلامتج
وزين انج ما ستعيلتي وتوكلتي عربج ومثل ماقلتي كلام الدكاتره خريط يبون الفكه وبس
اللي يصبر ويحتسب تتيسر الله
الله يسهل علينا اياام الولاده دعواتج خيتو^^
وزين انج ما ستعيلتي وتوكلتي عربج ومثل ماقلتي كلام الدكاتره خريط يبون الفكه وبس
اللي يصبر ويحتسب تتيسر الله
الله يسهل علينا اياام الولاده دعواتج خيتو^^