السلام عليكم
باختصار
انا كنت ساكنة بيت اهل زوجي لمدة سنة و نص
و الله يشهد علي ما غلطت بحقهم ابدا
و اول ما دخلت بيتهم عقب العرس يبت حق ام ريلي طقم ذهب
و كل عيد لازم اسوي لها مخورة
كنت انش الفير لين صلاة العصر
و عقب اروح الكلية
و غير اغسل و اكوي بروحي ف الويك اند او مرات والدتي تساعدني تقول لي هاتي اللي تبغينه و خدامتي بتكوي لج
او مرات اودي اللاندري
مع ان عندهم خدامتين بس ما ترضى حتى ان الخدامة تشيل مني سلة الغسيل ع ايام حملي و كان الجنين ضعيف ومحتاج عناية
حتى يوم انشر ملابسي ع الحبل ف الويك اند ما تخلينها تنزله و تصارخ عليها
مرات اساعدهم في المطبخ
و يوم هي تطلع مع ربيعاتها
حتى ولو الخدامة تطبخ اروح اجيك و احط السفرة و كرشتي يدامي و اشيل و احط
و من يوصل ريلي و يلس وياهم
تقول له حرمتك ما تطبخ ما تيلس ويانا
بعد جمن اسبوع
تقول له حرمتك تطلع و تدخل ولا تشاور
بعد جمن شهر
حرمتك ما تسلم علي
مرات تسولف يدامي تقول انا بناتي يلسون في بيت بروحهم
و اتم متضايقة لانها عطتني غرفة وحدة و عندها كذا غرفة فاضية بس مو راضية تعطيني
المهم كل اللي تقوله جذب و افتراء
المهم يوم من الايام كان الجوو رووعه
اتصلوا فيني اهلي قالوا بنمر عليج بنطلع
و المهم جفت ابو ريلي و قلت له عمي انا بترخص
و استأذنت من ريلي و هو كان ف دوامه
الا ام ريلي تتصل ف ريلي اونه طلعت و جافتني ولا سلمت
وانا لا جفتها ولا سمعت حسها اصلا
ريلي تضارب وياي اونه انتي اطنشيها و ليش ما تغديتي بيتنا……..الخ
بسم الله الرحمن الرحيم توني مستأذنه منك
قلت بمشي كل شي
الا انها تقول اني ما اسلم و تجذب
و قال لي سيري بوسي راسها راضيها هي زعلانه
!!!!!!!!!!!!!!!!!!!! ما ببوس راسها ولا شي هي اللي غلطت ف حقي و تجذب
وهي مب كبيرة ف السن
صغيرة في العمر
وانا لو جفتها بسلم عليها و بخبرها اني طالعه بس ما جفتها و هي كانت فوق ف حجرتها و خبرت عمي
طلعت ف بيت بروحي بعد ها الموضوع
طبعا سوت لي مشاكل و يوم طلعت من بيتهم قالت عني وصخة مب نظيفة
مو مشكلة سكت وما قلت شي
و مرتاحة الحمد الله اخر راحه البس و اطلع و اسافر و اطبخ براحتي
و كل يوم تتصل فيني و وااااااايد تغار
تبغي تعرف وين نروح وين نرجع
شو شرينا
وين بنسافر
كيف عندنا فلوس حق السفر
طبعا انا ما ارد عليها الا مرة في الاسبوع بس و ازورها مرة ف الاسبوع
من فترة ابوي شرى لي سيارة هدية
و اول ما عرفت انقهرت و سارت قالت لعيالها ابغي سيارة
و اتصلت ف ريلي عسب يشتري لها مع ان راتب عمي 30 الف كاش وما عليه دين مول
بس هي تحب تسحب من فلوس عيالها المتزوجين و تغار لو واحد منهم سوى شي ل حرمته
عاد ريلي وحليله حافي منتف بسبب الديون
قال لها امي ما عندي
و الحين كلما اسير بيتهم و تجوف سيارتي تقول ريلج شاري السيارة ؟؟ اقوله لا عمو ابوي شاري لي
حتى والله تصدقون ريلي اشترى سرير صغير حق ولدي حتى والله شرى له من فلوس عيديته
اول ما جافت انتوا ليش شارين وانا عندي سرير من 10 سنين بعطيكم
تمللت خلاص مب ف خاطري اروح بيتهم مول
كلما دخلت تسوي لي مشاكل
و كل يوم تتصل فيني شو اسوي
و من تجوف عندي شي تبغي نفسه
حتى يوم ربيت
تتصل فيني مب عسب تسلم
تقول لي ولدي عندج خلى ايى بيتنا يتغدى
اقولها عموو تغدى عندي
يا ربي شو اسوي فيها مب عارفة اتعامل معاها عدل و بطريقة زينة
مع ان رب العالمين عطاها 12
و بناتها مب مقصرين فيها بالفلوس
ما يملي عينها غير ريلي و اخو ريلي المتزوج اما الباجين ما تسوي فيهم جي
الحين كلما تتصل ما ارد عليها خلاص
يعني ارد عليها مرة ف الاسبوع بس
شو الحل بنات ابغي حللل تعبت و تمللت
و لو ما ارد عليها تروح تتصل ف ريلي غالبا يكون في دوامه و تقول له ليش حرمتك ما ترد علي
ومن ريلي يسير بيتهم اتم تجرجه علي
و الاحظ يوم يرد البيت يتضارب وياي
شو اسوي اصارحه بالموضوع
اقوله بالسالفة انها تتصل كل يوم كل دقيقة كل ثانية
ودقيلها وبندي اكثر عن مره ويوم تتصل لاتردين وقولي حق ريلج وينها عموتي ادق عليها ماترد علي فديتها حبيبتي
خلج قدامه طيبه ومسكينه لكن واذا دقت تكلمي كلمتين وقوليلها الجرج بيبند وغلقي فونج فويها مره وحده
عاد فضى الجرج شي مو بيدج ويوم تشوفين ريلج قوليلها حبيبتي ابا ارمسها عموتي اليوم فضى فوني وهي عالخط
السموحه لاني مانصحت بالخير بس ماداني هالنوعيه مرن علي وايد ببس انا قلبي صار قاسي واعرف اتعامل معاهن
معلش خليكي ببيتك وخليكي انتي العاقلة ولا تطلعين غير الكلام الموزون حتى ماتنحسب عليكي غلطات هيا بعد كم شهر بتبعد عنك بروحها وتنساكم
لانها اتعودت تشوفك تحت اديها وكيف تحركاتكم الحين انقطع عليها ها الشئ فبتغير الله يهديها المفروض تنشغل بكتاب رب العالمين ومثل ماهيا اخدت رجل من امو ابنائها نفس الشئ هدي سنة الحياة
بس مهما سوت بتظل امه امه امه يعني مول لا تحاولين تردين عليها بالمثل او تتكلمين جدام ريلج عنها بغلط حتى لو فيها ترى ما راح يرضى و بتستوي مشكلة
هذا الشي مفروغ منه
و فعلا التطنيش في مثل حالتج وايد مريح
الحين انتي صارت عندج خبرة و تعرفين طبعها فخلاص طنشي و ادعي الله يسخرها و تغير طبعها
حاولي تكوني عادي جدامها مب لازم تلبسين وتكشخين بكل جديد تشرينه جدامها اهي اكيد تشوف ان الي تشترينه بفلوس ولدها واهي اولى بفلوس ولدها منج لانها امه هذه نظرتها
اشوف انج تسايريها وتتجنبين تسوين شي يخليها تغار منج خصوصا اهي صغيرة على حسب كلامج يعني اكثر تغار عن الحرمة الكبيرة الشبعانه من الدنيا
واذا على اسئلتها وتجسسها على حياتج لا تعطيها كل المعلومات عنكم يعني ردي بشكل عام او غيري الموضوع وقلبي عليها مثلا اسئليها وانتي شو سويتي يا عموتي وين رحتي شو شريتي اهريها اسئله لين يدور راسها
بس بنصحج لوجه الله لا تحاولي تكرهينها فيج باي طريقة ممكن الحين اهي تغار وانتي منغثه منها بس بي اليوم الي يتغير كل شي والي تشوفج فيه اعز من عيالها
ما اقولج هالكلام لاني سمعته ولا ادعاء للمثاليه اقولج هالكلام من تجربتي
حطي ببالج كل العمات يغارن وهذا الشي مب بايدهن ونحن لازم نتحمل شوي منهن بعض التصرفات ونحاول نساير قدر المستطاع