عزيزاتي بالذات الي من الشارجة وعيمان / سؤال ضروري جدا جدا

صباح الخير

ماشاء الله القسم عامر بالاخوات العضوات والزائرات الكريمات والمشرفات الأكثر من روعة . عزيزاتي أنا دايما أمر على القسم وأشوف المواضيع الحلوه سواء الي تحتوي على صور أو الي فيها أسئلة وغيرها وأديلهم بظهر الغيب بكل التوفيق في حياتهم والله يرزقهم كل الي في بالهم .

بس اليوم عندي سؤال حابة أطرح عليكم بطلب من زميلتي في العمل . لكن قبل ما أبدأ في السؤال احب أبدأ في كلمة بسيطة.
احب أهني كل البنات الي يحتفلون بزواجهم أو بملجتهم الي تمت بفضل الله تعالي .

وأقول لكل الأخوات ( الي ينتظرون الناس الي كلموهم ووعدوهم ييون) أقولها لا تحاتين إنشاء الله بيتصلون وبيون وبيمر اللقاء المبدأي على خير انشاء الله .

وأقول حق الأخوات الي يتريون تحديد يوم الملجة أو الخطة ) لا تفكرين وايد ربج بيسهلها وفجأة بتشوفين تلفون الوالدة يرن وأم المعرس تتصل وتقولي نبى نتفق على الملجة.

وما انسى الأخوات الي يجهزون حق النظرة الشرعية واقولهم شدو حيلكم وإنتي مثل القمر سواء جهزتي عمرج أو كنتي عادية . لكن أباج تكونين واثقة من نفسج 101% يا العلوس الحلوه.

عزيزاتي سؤال زميلتي هو :

في واحد يداوم ويا أختها في دائرة حكومية وطبعاً إنعجب في البنت بسبب أخلاقها وتصرفاتها والأكثر من هذا إنعجب في نقابها صراحة وايد كبر وعيون هذا الريال . في زمن قمنا نشوف الاغلبية ما ينتبهون إلى الأخوات المنقبات والي يكونون قمة في الاخلاق.

ما أطول عليكم عزيزاتي هذا الريال أهله من عيمان والشارجة بس هو يداوم في راس الخيمة . فقالها انه بيكلم اهله عسب يبدأون في موضوع الزواج . لكن قاللها راح يكون الكلام في تفاصيل الملجة والزواج بدون الحاجة إلى زيارة تعارف أو النظرة الشرعية لاني مثل ما عرفتوا هو زميلاها في العمل.

المشكلة اني البنت تحاتي وايد ومب عارفة شو التقاليد المتبعة في عيمان والشارجة وبعطيكم الأسئلة الي هي محتاجة جواب عليها:

1- هل لازم اظهر لهم يوم ييون ولا مافي داعي (مع العلم انه المعرس يعرفها أو شاف صورتها في ملفها في العمل قبل ما يعتمد , وبعض من اهله شافوها يعرفونها مثل (الأم العمة الخالة الاخت))؟

2- كيف لازم نتحضر لهذي الزيارة ؟

3- كيف طريقة اهل عيمان والشارجة في امور الملجة والزواج وكيف يوم (ينقصون على المهر) لانها من راس الخيمة فتخاف يكون في إختلاف (أهم سؤال)؟

4- سؤالها الملقوف (هل عادة أهل الشارجة وعيمان في هذي الحالة ييبون هدية مثل شوكلاتة او باقة ورد وهي ياين) (لانهم عارفين اني ولدهم هو الي اختار هذي العروس)؟

السموحة عزيزاتي طولت عليكم لكن لاني هذي أول بنت بتتزوج عندهم الله يتمم لها على خير ويرزق خواتي من حيث لا يحتسبون . فحابة اني أساعدة وياريت انتو بعد تساعدونها.

ولو بمعلومة صغيرة من الي تعرفونة

في الإنتظر احبتي

هلا اختي

فالبداية الله ايسر امور ربيعتج واتم الخطبة والملجة على خير ان شا الله

نحن صارلنا نفس الموقف لما سرنا نخطب لخالي .. البنت اللي يباها وياه فالدوام .. يعني يعرف شكلها ويعرف اسلوبها .. اول زيارة لما سرنا نخطب كانت تقريبا زيارة تعارف .. قعدنا مع اهلها وتعرفنا عليهم وكنا ماخذين ويانا صينية جوكليت من باتشي .. فالبداية اهل البنت كانوا قاعدين ويانا .. وعقب البنت دخلت وشفناها وسولفنا وياها وكانت اول مرة نشوفها .. كانوا مجهزين الفوالة والعشا وما شا الله عليهم ما قصروا .. طبعا قبل لا يسيرون الرياييل خالي قعد مع خال العروس واخوها وخذ فكرة عن المهر اللي طالبينه .. ويوم الرياييل ساروا يخطبون اتفقوا على المهر

ربي يسر لها امرها يارب،،،

يضيفونهم شرا ما يضيفون ضيوفهم واهل راس الخيمه ما يقصرون ,,,

شوفوا الوقت متى بيونكم لان مب معقوله درب لين راس الخيمه وبس فواله،،،

يودوهم على العشا وخبروهم عشاكم علينا،،،

خلي اهلج يلسون ويا اهله خلاف وقت العشا او الفاله ادخلي،،،

البسي لج مخورة غاويه وحطي شي خفيف على ويهج ،،، وظهري شويه من شعرج،،،

لا تحاتين ولا تخافين واذا اطباعكم انتوا غير عادي عودا الناس على اطباعكم،،،

حتى لو ما عندهم لآن حتى في عيمان مب كل الاهالي عاداتهم شرا بعض،،،

وعن سالفه الهديه اللي من اهل المعرس ترا هذا في ويهم من الذوق لازم يبون شي،،

مدام اول مره بيدشون بيتكم،،،

وعن المهر الريييال بيرمسون عنه طبعا من انتوا اللي تبدون خليهم هم يبدون خلاف انتوا ارمسوا،،،

ولا ما بدوا برايهم،،،وعادي الرياييل ولا الحريم ،،،

لا تسون شراتنا الرياييل في الميلس قالوا الرمسه عند الحريم،،،

والحريم قالوا عند الراييل الرمسه،،،ههههه

ربي يحفظج ويسعدج ويوفقج يارب،،،،

اعتقد هالتقاليد عند الكل مب بس اهل عيمان والشارجة.. يعني ماتخص امارة.. هاي

بس بتكلم عنا نحن في الشارجة واللي لاحظته صار في بيت كذا وحدة من رباعتي

يزورون أهل الولد أهل البنت .. ويتعارفون وتظهر البنت بس ماتكون اوفر.. يعني انيقه ومرتبة .. بجلابية مخورة او شي .. وتقعد وتسولف معاهم عادي بس بحدود يعني ما تاخذ راحتها مره ولا ان تسكت مووول

واهل الولد يكونون يايبين معاهم حلاوة لأن اول مره يزورون بيت ناس مايعرفونهم من قبل.. وشي بعض من الناس ايبون هدية للبنت معاهم بعد.. يكونون اهل البنت مجهزين الضيافة الكاملة طبعا وعشا وغيره

بالنسبة لقص المهر العادة الي صارت لي وصارت لربيعتي .. الحريم يتفقون قبل ام البنت وام الولد بزيارة عادية وعقبها بفترة يستوي قص المهر الرسمي بين الرياييل..
وفي من الناس على طول بين الرياييل .. هالسوالف لا تخلينها تحاتيها وايد لأن ام المعرس اكيييد بتقول لأمها ان كيف بيصير التفاهم

وربي يوفقها ويسر امورها

مرحبابج انتي وربايعج بين خواتج .. وتسلمين غناتيا ع الكلام الطيب

القسم دومه فخدمة كل مقبله ع الزواج .. وباذن الله بنات الشارجه وعيمان ماراح يقصرن وياكن

وربيه يتمملكن ع خير

للرفع وإن شاء الله البنات يفيدونج ^^