بناء على طلب العضوة أم ميثاني وعدد من العضوات حبيت أعرضلكم على هذا الرابط طريقة خياطة فستان طفلة …. وإنشالله يعجبكم
هذا البترون حصلته في مدونة ثاني مع شرح بسيط لطريقة خياطة فستان طفلة….( طبعا طمست إسم المدونة عشان ما تنحذف الصور)
أول شي رسمة الباترون
تقصين البترون وتحطينه على القماش (ترضفين القماش بالطول ويكون ظهر القماش على برع) …. وتحطين البترون على نفس الطريقة الي في الصورة … الجهة اليمين مثنية والجهة اليسار مفتوحة.
بعد ما تقصين القطع … ثبتي على قطعة الظهر من الداخل بواسطة الكواية قطعة فازلين بالطول من الجهتين عشان تقدرين تركبين عليهم العقم (الأزرار) أو تقدرين تحطين سحاب . (متوافر في السوق آلة تثبيت الأزرار المعدنية وهذي أنا أشوفها أسهل)
رتبي القطع فوق بعض عشان تثبتين القطعة الأمامية مع تنورتها … والقطعة الخلفية مع تنورتها .
وهذا شكلهن بعد التثبيت
نخيط الأكتاف مع بعض
نركب الخيط المطاط على اليد
ونثبت الأكمام مع الفستان
نخيط الفستان على الخط الأسود المرسوم من الجهتين
نثبت قطعة الفازلين على الأبة ( على قطعة وحدة) ونخيط القطعتين مع بعض على الخط المرسوم … نكرر نفس العملية بالنسبة للأبة الثانية.
وهذا بيكون شكلها بعد من نجلبها لبرع
نركبها على فتحة الرقبة
ونقص قطعة بنفس طول دوران الرقبة عشان نركبها على الأبة و تخفي الخياطة الداخلية
نركبها على الأبة من الداخل ونخيطها بعدين نثنيها للداخل
وهذا شكل الفستان النهائي
بالنسبة للجلابية لا تقصين خط الوسط واتبعي نفس الخطوات …
وهذا موقع في بترونات حلوة للأطفال
https://photo.163.com/photo/lilifeif2…&p=1&n=66&cp=1
وإنشاء الله الكل يستفيد
يعطيييج ألف عااافية الغلا…
يزاج الله خير حبيبتي
و موفقة يارب
تسلمين على الطرح المميز
لاهنتي الساع
عندي ملاحظه عزيزتي لو تسمحيلي
ان شاء الله تكتب بهالطريقة وليس انشاء لانها بهالطريقة المعنى يختلف كليا
والسموحة منج*