شواء العيد عطريقتي بالفرن

انا من عشاق اللحم المشوي الي نسويه من عيد لعيد
وامي فديتها دايما ازن عليها ان ابغي اتعلم منها وبالفعل خذت طريقتها وسويت اللحم وكان يجنن
بحطلكم الطريقه وركزو معي

اول شي ذبيحتج لازم تكون طازجه ولحم البلاد احلى شي ممكن تستخدمينه
كل ماطال النقع كل ماكانت النتيجه احلى

اول شي خذت انا فخذ من لحم بلاد وقطعه من لحم بقري
وغسلتهم عدل وحطيتهم ينقعون 4 ساعات بملح وكركم

وبهالاثناء بديت اجهز الخلطه
خذي بزار والي هوه عباره عن كمون وسنوت مغسول ومنظف ومعرض للشمس عشان ينشف ومحمس لحد مايحمر وعقب نطحنه
خذي دبس مغرفتين كبار مال الصالونه وخفيفه بماي بعد مغرفتين كبار وعقب خذي من البزار مغرفتين كبار بعدمال الصالونه مثل الي واضحه بالصور
وضيفي عليهم ملعقه طعام كبيره قرفه وملعقه طعام كبيره فلفل اسود وحطيهم عالنار يثورون شوي ويا بعض

طبعا الدبس بيخلي القوام غليظ للخلطه بس ممكن تضيفين ماي لو حسيتي الخلطه واااايد غليظه وحطي من يثور شويه ملح وصكري عليه ولاتنسي انج مملحه اللحم مع الكركم وبيمتص اللحم الملح فلاتكثرين ومن تبرد الخلطه حطي لها 5 ثوم كاملات مقشره فصوصهم ومدقوقات عدل

من تحسين اللحم مر عليه ساعات من نقعه بالكركم والملح غسليه عدل بالماي وحطي عليه الخلطه وصكريه بالمونيوم فوبل ليله كامله او ساعات وكل مانقع اكثر كل ماطرا اللحم وصار احلى

وهنا يوم خلصت من لفه ودخلته الثلاجه ليله كامله جهزت ورق موز وورق همبا ولوز ممكن تحطون بعد وشوع . غسلت الورق ونظفته ونشفته وبديت اصفه

وقبلها جهزت طبقات من ورق الالمونيوم الفويل وعليها حطيت قماش من قطن مبلول بماي عدل

وخليت عليه ورق الموز وسويت طبقات عشان ماتتسرب الخلطه لبرع القماش

وبديت الف الموز عاللحم وورق الهمبا خليته بين اللحم

يتبع…