ريلي تغير عليه.. ما صار يحبني.. قبل غير والحين غير.. دشوا حبيباتي ^__^

صباحووو صبايااا ^___^

شحالكن؟

طبعا قريتوا عنوان الموضوع واظن 80 بالميه من البنات يحسون بهالشي او بالاحرى خلوني اقول يعانون من هالشي..

فقررت اني انزل هالموضوع من خلال خبرتي المتواضعه في نصح ربيعاتي و ملاحظتي الدقيقه لحياه ربيعاتي وبشكل عام حياه البنات اللي حواليني..

قبل لا ابتدي في الموضوع احب اقول هالموضوع عباره عن راي شخصي لا اكثر ولا اقل.. وعباره عن تحليل لمواقف وايده مرت ع ناس حواليني وطلبوا مني فيها النصيحه..

انزين..

اكثر عن وحده اتيي تقولي او تكتب في المدونة " ريلي تغير عقب العرس".. " ما صار يحبني مثل قبل".. " قبل كل يومين يطلعني واييب لي هدايا والحين تغير".." في الملجه ما يدش عليه الا وفي ايده هديه و مبتسم و يضحك ويسولف والحين كله ساكت وما هداني حتى ورده".. وغيرها وغيرها من العبارات اللي ممكن تختلف في ترتيب كلماتها بس المضمون واحد.. الا وهو تغير الزوج بعد العرس او بعد مرور اول شهور الزواج..

انزين تصدقون لو قلت لكم انه 90% من اللي تحسون فيه هو من وحي خيالكم فقط و نتيجه خطا فادح يرتكبه اغلب الرياييل في فتره الملجه واول شهور الزواج؟؟

كييف؟ بخبركم..

الريال اول ما يملج يلاقي مليون واحد ينصحه ابتداء من ربعه في الدوام لين امه واخته" لا تدش عليها الا وانت شال هديه.." " تم ابتسم لها و اضحك عشان البنيه ما تكرهك وتقول عنك نحيس".. " لا تكدر خاطرها باي شي حتى لو كنت متضايج خله لبعد العرس".."تم قولها كلام حلو ترى هذه فتره و بتخلص"

فشو اللي يستوي؟ الريال الفقير اللي ما له خبره وايد يتم رايح راد ع بيت الحبيبه وفيه ايده هديه كل مره و مبتسم و يسوي عمره الحياه مب سادته من فرحته فيها ويتغزل في جمال الزوجه ع الطالع وع النازل ويتم يراضيها لو زعلت سواء الغلط منه والا منها و المكالمات تمتد للساعات والمسجات ما توقف الخ..

انزين وبعد العرس شو يستوي؟ خلاص يرجع كل شي لطبيعته و الريال خلاص يقول في خاطره خلصت فتره التمثيل و مراعاه مشاعرها بزياده والحين بدينا حياه الجد..فبتشوفينه بحالاته كلها.. معصب زعلان مستانس ساكت مبوز.. و خلاص الحين ما صار له بارض ولا الوقت عشان يتم يراضيج كل ما تدلعتي..وغير انه مصاريف العرس كاسره ظهره فبيتم يطلعها اول كم شهر وبعدين خلاص يفكر يوفر هالبيزات احسن عن الطلعات والمخاسير وتصير الهدايا قليله لنفس السبب..

فشو تحس الحرمه؟ انه تغير وما صار يحبها واول كله يطلعها و اييب لها هدايا و يتغزل فيها والحين يادوب يلاحظ لبسها او لون شعرها..

حبيباتي..اولا الريال هذا طبعه.. قصدي طبعه اللي بعد الزواج.. الريال بطبيعته كلامه قليل و ما يلاحظ الامور البسيطه مثل فستان يديد او صبغه يديده.. و اللي تسمعينه في مسلسلات قوم مهند وربعه انه يتغزل فيها ويلاحظ لو حتى شخطت عينها بجحال هذا كله جذب في جذب حبيبتي.. والبي سي اللي يوصل انه الريال الاماراتي دفش و غيره يتمدح في مرته بعد انسي هذا كله خرط.. الريال هو الريال في كل زمان ومكان.. والله خلقه جيه.. سواء كان خليجي والا اوروبي والا هندي والا شو ما كان..

ثانيا عزيزاتي.. اللي استوى بعد العرس مب انه تغير عليج او قل حبه.. بالعكس الحب يكبر بعد الزواج ويستوي اعمق وتتغير صور تعبيره.. قبل العرس كان بالكلام .. بعد العرس يستوي بالافعال..باهتمامه ببيته.. بانه ما يقصر عليج باللي تحتاجينه.. بانه يعرض انه يوصلج المكان اللي تبينه.. هذه كلها علامات الحب.. بس احنا الحريم ما نشوف ولا شي من هذا.. بس نقعد نقارن بين الملجه وبعد العرس..

حبيباتي بعد العرس تبتدي الحياه الحقيقيه.. والانسان ينشغل و يبتدي يحسب لكل شي بيسويه ويفكر في المستقبل + النقطه المهمه انه الكل كان يقنعه يشد حيله في الملجه بدون لا ينتهبون لنقطه انه بعد العرس ما بيروم يسوي نفس هالاشياء .. فيطيح حليله في الدوامه من زوجه مبوزه وتتهمه انه مقصر وتغير و قل حبه الخ الخ..

الريال لو يحسبها بالعقل و يفكر شو بيستوي بعد العرس لما ما بيقدر يقدم لها ربع اللي قاعد يقدم لها في فتره الملجه جان ما صارت كل هالمشاكل..اهم شي الاعتدال الاعتدال ثم الاعتدال في كل شي.. لا تستوي كريم بزياده وحنون بشكل مبالغ فيه في فتره الملجه و عقب العرس تتوهق لما تحس عمرك ما عندك الوقت ولا القدره عشان تسوي اللي كنت تسويه قبل..

وتدرون شو هي المشكله الاكبر؟ انه الحرمه بدل لا تقعد بهدوء وتناقشه في هالموضوع .. تلاقينها زعلانه و منزله موضوع طويل عريض..

قعدوا مع رياييلكم وتناقشوا حبيباتي.. لا تقولون مالي خلق والا ما بيسمع .. انتي جربي مره ومرتين وثلاثه.. و ترى الريال ع شو تعودينه.. يعني لو عودتيه من البدايه انه لما يستوي شي تتناقشون خلاص بتستوي عاده.. بس لو تميتي مثل هالحريم اللي تقول " لا ما بضايقه" او " ليش اعور راسي ما فيه فايده" عيل بتعيشين طول عمرج حاسه انه سعادتج ناقصه وانه في خاطره وااااايد كلام متيمع من هالمواقف البسيطه اللي تستوي كل يوم.. فتناقشوا مع بعاليلكم يا بنات.. عودوهم ع النقاش والحوار.. ومثل ما قلت لكم الريال بطبعه كلامه قليل.. فانتي لازم تعودينه.

اتمنى اكون وصلت وجهه نظري.. و انا نزلت الموضوع بس عشان الصبايا اللي تعبانات نفسيا يرتاحون ويعرفون انه الريال لا تغير ولا حصل له وحده غيرج ولا شي.. كل المساله انه رجع لطبيعته..

وطبعا انصحوا اخوانكم انهم لما يملجون لا يبالغون في سالفه الهدايا والغزل.. كل شي بحدود عشان البنت الفقيره ما تنصدم بعد الزواج واييها احباط لما كل شي يختفي فجاه..

والسموووحه ^__^

تسلمي على الموووووضوع

يزاج الله خير

تسلميين اختي على الموووووضوع

حياكم الله حبيباتي ^__^

تسلمين الطيبة عالموضوع الحلوووو تقبلي مروري