حبيت اخبركم عن تجربتي اللي حزت في خاطريه واااايد
من عرست تقريبا صار لي شهرين والحين امشي في الثالث
مره وحده تعبت وقمت ارجع وحالتي لله هالكلام صار من بعد العرس بشهر تقريبا
المهم رحت المستشفى وللعلم اني اول مره اروح له -مستشفى توام – بعد الكشف قالولي مافيه حمل و
اني ماخذه برد في المعده وحطولي مغذيات وعطوني ابر عشان البرد على قولتهم المهم تعافيت لمدة بسيطه جدا وبعدها باسبوعين رجعت امرض مره ثانيه وصارت لي نفس العوارض بالضبط وهلكت والله ماقدرت اتحمل حسيت اني بموت.. رحت على قولتهم عياده اسمها عيادة نعمه.. نفس الشي فحصتني وجيه وسوت لي فحص حمل وطلع مافيه حمل.. وعطتني نفس ادوية توام بالضبط.. طبعا استعملت الادويه مثل ماوصفت لي الدكتوره… ولكن!!
فجأه انتبهت انه موعد دورتي طاف وصار له 3 اسابيع!!! قلت في خاطري بسوي التست المنزلي وامري لله… رحت وخذت احسن انواع التست -والله اني اذكر الضباب في ذيج الليله وفوق كل شي طلعت انا وريلي وكانت الساعه 3 تقريبا الفجر ورحنا الصيدليه المناوبه اللي في السوق..
المهم قلت مابسويه الحين بتريا لين اقوم اصلي الفجر وبسوي الفحص… حان الموعد وسوت الفحص وقلت بخليه في الحمام -اكرمكم الله – لين اخلص صلاه …
وبعدي ريلي دخل علشان يتوضا…. وتخيلووو المفاجأه شو كانت؟؟؟
ريلي يايب لي الفحص ويربع من الوناسه حتى والله اني تروعت وماقدرت اقرا قرآن من بعد الصلاه
قلت له شفيك؟؟ قالي انتي حامل !!!
انا طبعا فجيت عيوني وقلت في خاطري ها بشو يخربط الحين؟؟ قلت له شفيك انت صاحي ياني وحبني على راسي وعطاني التست!! وفعلا طالع اني حامل!!!
قلت اكيد الموضوع فيه ان… ورحت الصبح مره ثانيه العياده وهني الطامه الكبرى… اكدت لي اني حامل بـ 26 يوم تقريبا!!! وتخيلو هال26 يوم انا شو سويتبهن؟؟ رحت وتعالجت وخذت ابر وكل مره يفحصون عليه ويقولون لي اني مب حامل… قلت لها من يومين كنت عندج وقلتي لي اني مب حامل!! قالت لا مب انتي!!! وعشان ااكد لها طلعت لها الوصفه اللي بروحها كتبتها لي بايدها وعليها توقيعها وختمها… سكتت وتلعثمت وماعرفت شو تقول
قلت لها عطيتوني ابر وحطيتولي مغذي وقلتو انها نزلت برد وبتعدي… الحين شو ممكن اسوي علشان مايتاثر الحمل..(وحليلي على نياتي)…
قالت ماتخافيش وده شي طبيعي الخ….. ومن هالخرط
طبعا ريلي عصب قالي مابوديج عندهم مره ثانيه هذيلا يبون يجربون على بنات الناس.. ورحت لمركز طبي في بوظبي كل خواتي يعالجن فيه وعندهم دكتوره الكل يمدحها لما دخلت عليهاعلى طوول خبرتها باللي صار لي ويوم سوت لي السونار…صدمتني اكثر واكثر بس احلى مافيها انها كانت صريحه معاي
قالت لي( مر على الحمل تقريبا شهر يعني باجي له كمن يوم وبيكمل الشهر-بس للاسف انه هالجنين بينزل لانه واضح انه متاثر بألادويه وخاصه انها سوت لي فحص هرمونات وفحص جيني للجنين.. المهم قالت لي انه هالجنين مابيتم اكثر من 3 شهور واذا بقى بيتم لين الشهر السادس وبينزل لانه بيكون مشوه خاصه لاني خذت ادويه وايد عشان نزلة البرد اللي مالها وجود)…
هني عاد صج عصبت من الخااااطر وزعلت بنفس الوقت وطلعت من عندها اصيح وريلي زيغان ويسالني شو السالفه وماخبرته لين وصلنا السياره وفي دربنا لدار الزين خبرته بالموضوع كله..
هو بعد انصدم وتم معصب قالي يعني شوو؟؟ قلت له اللي ربك كاتبنه بيصير -اللهم لا اعتراض-
مانشرت الخبر اني حامل لاني كنت متخوفه وااايد وبعدها بـ 10 ايام بس يعني ( من يومين) صار لي نزيف حاااد وماقدرت اتحمل الالم وقلت له خلني اموت بس هني لا توديني لاي مستشفى وجان يوديني طااااااير لبوظبي لعند نفس الدكتوره وطبعا نزل الجنين ..وماقصرت فيني ياحليلها وعطتني ابره تنظيف صح اني تعبت بس هالتعب ياب لي راحه لاني عرفت عند منو اسير ومنو استشير…
بس كل اللي زعلني انه ليش مايشتغلون بذمة وضمير؟؟؟
يعني كان ممكن اني اموت بسبب نزلة البرد اللي مالها وجود!!
والمصيبه اني تعبت مرتين وبنفس الاعراض والكل قالي اني مب حامل من بعد فحص الحمل اللي سووه لي على قولتهم!!!
الله كريم -والله يعوضني
بس حبيت اكتب هالقصه اللي صارت لي لاني صج مخنووقه ومضايجه من اللي صار لي
بس قولولي هالشي اللي صار لي شو بنظركم اهمال مني ولا منهم؟؟
وعسى ربي مايحرمكم شوف فلذات اكبادكم آمين
حسبي الله عليهم
والله يعوضج قريب ^_^
حبيبتي تو الناس بعدج عروس
لاحقة ع اليهال وصدعتهم
الله يعوضــج أختـــي
الصراحه أنتي مالج ذنب ،، المستشفيات فالدولـه صارت تخوف،،
وعسى أن تكرهوا شيئـــاً وهو خيرً لكم
لا تضايجين عمرج فديتج ،، الله يعوضج ان شاء الله قريب ،، أهم شي صحتج وعافيتج الغاليه