حامل ؟ متعبج الوحام ؟ والمرارة ؟ الخ .. ~ حيآج لسلامتك

،

السلام عليكم ورحمة الله وبركاته

هذآ أول موضوع أطرحه في المدونة ومن مجهودي الخاص وخبرتي المحدوودة جداً
وكل اللي ابي منكم دعوة حلوة في هالشهر الفضيل ان الله يثبت حملي

،

طبعاً أنا هذا أول حمل لي
وبصراحة ، ما توقعت أنه الحمل جي أبد !

وأعرف انه كل حرمة طبيعة جسمها وهرموناتها تختلف عن الثانيه
فمب معناته ان اللي اكتبه ينطبق على كل الحريم
لا تخافون حبيباتي والله لا ييبكم لمثل هذي التجارب ويكون حملكم أسهل عن حمالنا يآ رب

بقول لكن عن خبرتي وكيف حاولت أندمج " ولا أزال قيد الاندماج " / دعواتكم

طبعاً أنا سويت الاختبار عن طريق كلير بلو شريته من الصيدلية ، وطلعت لي النتيجه واااضحه *.*
فرحت وخفت نفس الوقت .. لأني كنت جداّ طبيعية وتحريت اني بتم جذه طول فترة الحمل

ويوم عرفت اني حامل كنت توني فالاسبوع الرابع يعني بعدي فالشهر الأول

الحين المصيبة *.*

أول ما دخلت الشهر الثاني
وانا فالدوام عفت كل شي وسواءً كلت ولا ما كلت يكون فيّه لوعة فظيعة !
جرّبت اشرب ماي ، قطرة بس وطلعت روووحي قعدت طول الوقت فالحمام ارجّع عزكن الله

من حزتها عفت شي اسمه ماي
وكل ما اجرب شي اعوفه
تميت على هالحال في أول اسبوع من الشهر الثاني

وسجّل غيابي فالدوام زااااد
ما اقول لكن اني ما حاولت آكل ولا اشرب

لا بالعكس ، احاول بس عقبها تطلع روحي لين يودوني المستشفى وينوموني واتم عالمغذي
كرهت حتى ريحة الاكل والشرب

الشي الوحيد اللي كان يخفف اللوعة عني " اليِح "
وعقب ثاني أسبوع من الشهر الثاني عفت حتى اليِح ! الله لا يراويكم اشكثر انا اعاني

صابني جفاف ووزني نزل وغير هذا فيني نقص في كل شي من انيميا وحديد *.* اللهم عافنا *.*

ويوم دخل رمضان، كنت توني فالاسبوع السادس ، وحالتي ما كانت تسر لا عدو ولا صديق
حتى لو افطر على تمرة بس اتم ارجّع لين تطلع روحي ويغمى عليه

عطوني قبلها النافوداكسين اظني جي اسمه .. " دوا تخفيف اللوعة "
ما فادني اببببببببببد
كنت اموت بزيادة يوم آخذه

والكل فالبيت يأس مني وصارو يتعبون من يجوفوني لانه فعلاً حالتي كانت فظيعة

عقب رحت مستشفى خاص من يومين ، وقالوا لازم ينوموني لانه حتى لو يعطوني مغذي بعد ارجّع
يعني ولا حل فاد ويايه

الحين انا فالبيت كملت الاسبوع السادس .. وصفت لي الدكتورة تحاميل وحبوب تنّوم تخفف اللوعة
الحمدلله من خذته شووي بنسبة 5% خف عني هالتعب، بس الحمدلله اهون عن قبل ! كنت شبه ميته

وقالت لي من انش من النوم وانا عالسرير آخذ قطعة بسكوت " تَك " واحطها فثمي وامضغها بالراحات
عقب انش اتغسل وجي

واتم فمكان بارد لانه الحر يزيد اللوعة والمرض ..
وعقب ما انش بساعة آكل خيار وشوي ملح اصبه فوقه
يعني آكل بالتدريج .. واشيا خفيفه مب كلها مره وحده

مثلن سلطة وعقبها عيش
او سلطة وعقبها اكله معينه
هذا يسبب اللوعة ويخليج ترجعين على طوول

واذا حسيتي انه المرارة فالثم ما تفارقج طول اليوم شراتي
وطبعاً نحن فشهر فضيل .. أول ما انش ما آكل لين وقت الفطور

أول ما يأذن .. اقص ليمون واحط قطعة صغيره منه فثمي لمدة دقيقة
واللي ما ينفع وياها ليمون ويزيدها مرارة ، تاخذ قفشة آيس كريم فانيلا أو كراميل أو اللي تحبه
المهم شي حلو " ومب اكسترا حلوو " حلو بس يكون خفيف ..
واللي ما ينفع وياها اللي فوق ، تاكل قطعة همبا " مانجو " وتحاول تريح شوي نص ساعة أو ساعة
تشرب عصير أول لبن أو اللي تحس انه يخف من مرارتها ..

وعقبها تقص لها خيار وشوية ملح ترشه فوق ، او تاكل سلطة فواكه ، أو عيش وروب !
المخللات واايد تنفع بس خذيها بشويش وبالتدريج

المهم تبتعد شوي شوي عن البهارات ، حتى لو معكرونه بالروب .. أو كرواسون خالي تاكله

المهم الأكل لازم يكون بالتدريج ..

وعقبها فوقت الراحة من الأكل ،، تستحين تقعدين ويا الاهل وانتي كله لايعة جبدج وهالمرارة مليتي منها
اشتري لبان اكسترا بنكهة الفراولة " خذي لج درزن "
وتمي امضغي وخذي منه الطعم وعقب فريه يوم يخوز الطعم عنه " يا ويلج إن بلعتيه ! "
وكلي حبه ثانيه واستمري على هالحال ..

وقت السناك .. كلي آيس كريم حتى لو قفشه او ثنتين
اذا حسيتي مالج مود للآكل .. خذي تفاحه أو موز

شربي حليب " وانا مش من انصار الحليب بس مغصوبة "

اللبن عن تجربتي يزيد طعم المرارة فثمي ..
شربي عصاير كلها طبيعية .. ابتعدي عن الصناعي لانه عن تجربتي تزيييد المرارة ..

خلي فغرفتج ثلاجه .. خذي لج اصناف الفواكه ، حليب فراولة ، حليب كاكاو ، حليب قليل الدسم أو كامل الدسم ، وآيس كريم ، واهم شي الفراوله

بين فترة وفترة ونسي بطنج بهالاشياء الصحية ..
وبوقت الراحة لا غنى عن لبان اكسترا طبعن ..

الحين الحمدلله انا احسن بوايد .. صح انه اللوعة ولا التعب فج عني
لكن انا صرت احسن بنسبة 45% بالميه ..

وما اقدر اقول غير الحمدلله على كل حال

وابي دعوة حلوة منكن ان الله يثبت حملي، ويخفف عني هاللوعة وصدق ضريبة الامومه شي مب سهل أبد ! .. الله يعينكن ياللي شراتي

والسموحه

الله يثبت حملج ويتمم لج ع خير ,,,

نفس وحامي فديتج…
ألحين انا في نص الرابع…ولارح الترجيع(((سالت مفتي قال ماينفع اصوووووم)))
قد خف عني شوي بس ليلة رمضان قال الوحام يا أنا يالصيااااام صمت يومين مع الترجيع….بس قالو ماينفع
الله يعينا بس
فيه حريم ماييدربه …….أشهد انهن في نعمه
الله يازيج ألف خير

حبيبتي أنة سواتجً وكل ما اكل اتلوعً جبديً وارجع ونزل وزني يوم شافتني الدكتورة طبعا مستشفة خاص ويوم شافت الدكتور حالتي جي يعني زجامً وحمة ونزل وزني وضروسي هههههههه عطتنيً مغذي وابرةً ورديهً وإبرة ثانية بس من يومها ما رجعت الا قبل رمضان قمت وااايد ارجع والحين يوم اكون صايمةً ارجع قبل الفطور بس مايبطل صياميً يلا يختش امشينً اول وآخر حمل

اللهم آمين
مشكوره حبيبتي أم عمر

الله يثبت حملج

صدقج والله في نعمه ، ربي يرزقنا شراتهن
وان شا الله يآ رب يخف عنج وتغدين انتي والبيبي بكل صحة يآ رب
وصدق انا بالغصب يوم ترقدت فالمستشفى فطرت ، لكن بعد ما استقرت حالتي كملت صيامي

ويجزيج مثله يآ رب