تجربتي السيئة ويا الدكتور مازن وعيادة اسثتيك part2 من مطبخ الامارات

السلام عليكم مره ثانية
https://forum.uaewomen.net/showthread…6#post42656136

وصلني عالخاص رسايل تسالني اذا حصلت حل لموضوعي
والبعض سالني لانهم مو راضيات عن الفلر الدائم اللي سووه وحابات يعرفون اذا شي طريقة لازالته

اولا حبيت اقول الحمد لله هي حصلت طريقة لازالته
اللهم لك الحمد اللهم لك الشكر
فضل من وبي ونعمة

سمعت من قبل عن تينا في عيادات فيتال (اسمها الاساسي زلتينا)
وليتني ما سرتلها هي بعد!!!
والله انا مستغربه من هالبنات اللي يمدحون بهالناس!!!!!!
اسعارها جدا نار
قلنا ما عليه في سبيل انها تساوي بين جهتين خدي
تمت تتعبث وفوق هذا كله لا عدللت في خدي ولهبتلي عرج تحت عيني!!!
واسلوبها غبي وشايفه عمرها

سرت عند دكتوره ( ما بذكر اسمها)
لانها كانت لطيفة وياي شخصيا ولكن فعليا مو شاطره
قالتلي بتسويلي جراحة موضعية عسب اشل الفلر الدائم
وعقب عذاب اللي شفته والتشوه والانتفاخ
الفلر ما راح

شريف في اوباجي قالي انا ما اعدل اغلاط غيري
شريف رائع كشغل لكنه مشغول وزحمه وايد وغير متعاون

ونسيت اخبركم اني قبلها يوم كنت في عيادة اسثتيك حولوني على دكتور
حاول انه يكون لطيف وياي ويعدل اللي دمره زميله مازن
لكنه خبصلي زياده
وكنت بقمة الاحباااااط

الين دقيت باب دكتور غير معروف
لانه كان يشتغل برا البلاد وتوه بدا هني من كم شهر
قلت ما عندي اي فرصة ثانية
وما عندي غير اني اجرب
وكان وائع معنى الكلمة
تعامل وشخصية وحرفية
تخيلوا يا بنات خوزلي الفلر الدائم وبسعر جدا زهييييد
يعني الالاف اللي دفعتها عند تينا ومازن وغيرهم كانت عالفاضي

طلبت منه بعض التعديلات اللي طلبتها من مازن اول مره
رفض !!!! وقالي حرام انتي صغيرة وما تحتاجين
تخيلوا يعني دكتور يقولج لا تسويين!!!
قالي انا ما يهمني الماده ولو اصريتي علي بقولج اسمحيلي وخلي حد غيري يسويلج لان ويهج ابدا ما يحتاج فلر ولو كان يحتاج كنت سويتلج

طلبت منه عالاقل انه يعدلي خبصة تينا تحت عيني
والحمدلله عدلها وبعد مشى الحال

والحين بديت كورس تقشير عنده
الرائع بطريقة تقشيره انها مووول ما تسبب الاحمرار او تقشر للبشره
لانه يعطيج كريم يغطي القشر ويخوز عقب ما تغسلين ويهج
انا مستانسه بهالنوع من التقشير لاني من زمان كنت حابه اقشر
ولكن كنت متردده بسبة الدوام وكيف شكلي بيكون وهو متقشر
الحمد لله احس عمري حاليا اروع ما اكون ماااا شاء الله
هذا من فضل ربي عقب شهرين من التعب حصلت الدكتور المناسب الغير مادي

واسمحولي بنات انا ما بذكر اسم الدكتور
مو عشان اي شي
لان اللي ناسبني يمكن ما يناسب غيري
وما اريد وحده تزعل مني لو انها ما اتفقت وياه

موضوعي الثاني هذا عسب كل وحده تستفيد من تجربتي
١. لا تصدقين كلام البنات والمدح الزايد
٢. يوم بتسوين فلر اسالي نوع الفلر ومدته وهل يذوب اذا بغيتي تخوزينه؟؟
٣. شلي وياج اسم الفلر اللي سواه بويهج ومن اي بواند لان هالشي وايد بتحتاجينه اذا صارت مشكله
٣. الفلر شيء رائع وعلاج لوايد مشاكل الوحده حابه تعدلها بويها لكن الاهم انج اتسيرين عند دكتور شاطر وصادق
مثلا انا كانت مشكلة حياتي الهالات السودا
واستخدمت افضل الكريمات وما كان يحوز
الا يوم جربن الفلر وعبيت التجويف تحت العين
واكتشفتً ان السالفه مو سالفة هالات والسالفه كانت ان التجويف تحت العين كان يعطي لون غامج للعين ويوم عبيته اختفى السواد لدرجة اني ما احتاج كونسيلر ما شاء الله ولله الحمد

واخيرا اتمنى ان موضوعي وايد بنات يقدرون يستفيدون منه

أنا وايد مدحولي مازن ومقررة اصلا اسير له في اقرب وقت وشفت ربيتعتي مسويه عنده وايد حلو عليها :S

ممكن اعرف نوع التقشير اللي تسوينه الحين اسمه بالضبط

بصراحة البوتكس سهل و ما يسبب اي شي ثاني بس
الفلر يخوف بصراحة لانه ممكن يعطيج نتيجة سلبية لو كان الدكتور مب شاطر 100 % او مرات ما يليق ع الشخص و مفروض الدكتور يبلغ المريض بها الشي

ان شاء الله اللي واجهته وياه ما تواجهينه
وبالاخير هالشي راجع لانطباعج عنه يوم بتسيريله اول مره
واتمنى اللي استوالي ما يستويلج

الغالية انا وعدت عمري ما بحط اسامي اشخاص ومنتجات عسب لا حد يدعي علي عقب
فالسموحة منج
ومعاج حق البوتكس ما يباله شي
لكن الفلر يباله شطاره