بنت جنيف تم الرد على استفساراتج هوون (المانيا و النمسا) .. حيااج حبيبتي ^.^ في الامارات

شحالكن خوااتي ؟

وحده من العضوات (بنت جنيف) طرشتلي رسالة ع الخاص تسألني عن السفر لـ المانيا و النمسا في اجازة العيد ^.^

و انا بجاوب على استفساراتها هنيه عشان الكل يستفيد و لان التواصل فالموضوع اسهل عن الخاص .. و بعد الخاص زحمة زحمة ارحمووووني يا ناس –> اسولف فديتكم والله عسسل على قلبي

بنت جينف حبيبتي هذا الباكيج و ماعليج الا الحجوازات :

الرحلة من 11 / 11 لين 19 / 11 من دبي إلى ميونخ

طبعاً انتي طلبتي الباكيج بدون التذاكر و انا مشيت على طلبج =)

البرنامج بيكون كالتالي

من 11 / 11 لين 12 / 11 –> ميونخ يوم واحد للراحة

من 12 / 11 لين 16 / 11 –> زيلامسي 4 ايام (اماكن طبيعية)

من 16 / 11 لين 19 / 11 –> ميونخ 3 ايام (اسواق وكافيهات وحدايق)

السكن في ميونخ حاولت اشوفلج شقق فندقية بس الشقق الزينه كلها محجوزه في هالفتره و خصوصاً اول ليلة ! مادري اعتقد عندهم مهرجان سنوي او شي من هالقبيل عشان جيه زحمة

انا انصحج بالفنادق احلى عن الشقق اذا انتي و ريلج بروحكم او عندج بيبي صغير يعني المهم مب عايلة كبيرة

و سويت سيرج على الفنادق اللي اعرفها حق اول ليلة الصراحة اسعارهم واايد مرتفعة عن الاسعار المعتاده .. حتى الفنادق اللي 3 نجوم الكحيانه من 900 و فووق !

الظاهر ان توقيت زيارتج يصادف نهاية المهرجان مالهم عشان جيه الاسعار نااار .. ولا يمكن يعرفون انها اجازة العيد عندنا –> قوولي والله انتي بسس

المهم آخر 3 ايام في ميونخ بترجع الاسعار طبيعية لان المهرجان بينتهي و بترتاحون من الزحمة و الحشرة

ارشحلج هالفندق 4 نجوم مناسب و قريب من المارين بلاتز و محطة القطارات الرئيسية و نظيف و راقي و مرتب

Mercure München City Center

سعر الغرفة حق شخصين اول ليلة 1296 درهم

و آخر 3 ليالي 1586 درهم –> لاحظي مجموع 3 ليالي قريب من سعر ليلة وحده في فترة المهرجان مالهم !!

و في زيلامسي ارشحلج هالشقق مكانها في السنتر و راقية و نظيفة و سعرها رخييص :

Appartementhaus Zell City

سعر الشقة بغرفة نوم و صالة و مطبخ و حمام (الله يعزكم) 1400 درهم لمدة 4 ليالي

و عندهم شقة اكبر و اوسع بغرفتين نوم على 1600 درهم و هذي صورها :

المواصلات في ميونخ ارخص و اسهل شي القطارات (الاندر جراوند)

اما في زيلامسي انصحج تستأجرون سيارة من ميونخ ثاني يوم و تطلعون فيها على زيلامسي و تردونها يوم ترجعون ميونخ

و ما بتطلع عليكم اكثر عن 250 درهم فاليوم .. يعني مجموع 4 ايام = 1000 درهم

و احسن شركتين للتأجير هم يوروب كار و هرتز و عندهم فروع هنيه فالبلاد .. تقدرين تتصلين فيهم و تحجزين السيارة و تستلمونها هناك بعد ما توصلون و بدون ما تدفعون مقدم للحجز ^.^

يعني الباكيج شامل السكن و المواصلات = 5500 درهم تقريباً

اعتقد على الميزانية اللي حطيتيها بالظبط ^_*

و في النهاية مابا منج غير دعوة حلوة بالتوفيق في حياتي و دراستي