أخباركن؟؟؟
لا خليت منكن أبا وحده تقولي وين أسير بالتفصيل في رأس الخيمه
بوصل تاريخ 30
وبطلع تاريخ 6/1
وحجزنا في فندق الكوخ على ماظن
ما ندل شي هناك بس بنسأل
و جزاكم الله الف خير
بتنورين راك فديتج
اولا حبوبه الفندق اسمه الكوف روتانا
ويازين مااختري الفندق متوفر فيه كل شي
من حوض سباحه خاص بالغرفه نفسها ومطاعم متنوعه
ودام الجو حار نار مالج غير المولات
عندج منار مول والسفير مؤول
وان شاءالله البنات مابيقصرن وياج
اقامه ممتعه حبوبه *
الكوف روحه منتجع حلو وفيه مطاعم حلوه وسومينج بول
اموت على هالستايل
نحن حجزنا غرفه مع صاله وسومينج بول ,, واستانسنا وايد
عندج الحمرا مول في كافيهات حلوه مثل شكسبير و موكا كافيه وغيره من المطاعم
واذا اجدمتي عن المول شوي وخليتيه على ايديج اليمين بتحصلين البحر.. انا وريلي نشل اغراضنا وأكلنا ونروح مرات بس نيلس واذا كان المكان فاضي نسبح
المنار مول طبعا المحلات اللي فيه عاديه مثل كل المولات .
.بس المميز اللي فيه انه ايطل عالبحر وبيكون حلو اذا كان الجو حلو
وفيه مطاعم متنوعه وسينما والعاب لليهال,, ومطعمي باستامانيا
السفير مول عادي .. بس محلات ومطاعم
عندج منتجع عين خت في منطقه خت في للرييايل وفيه للحريم
عندج بعد منطقه عوافي .. بس هي روعه فالشتا,, اذا مريتي فيها اللحين بس بتشوفين العزب
والحركه قليله فيها
بما انه الصيف عند حديقه ايس لاند.. ما رحتها.. بس يمدحونها
نحن اغلب شي نروح في راك المطاعم والبحر
ويزاكن الله الف خير