اليوم ياي على بالي موضوع مهم … تناقشت وياه مع صديقاتي و كان لهم وجهات نظر مختلفة .. فحبيت اني اطرح الموضوع على المدونة و نشوف اراء الحريم ..
السالفة سلمكم الله انه من المعروف انه الحرمة في بلادنا يوم تربي تيلس عند اهلها 40 يوم .. و ممكن تتفاوت بعضهم اقل و بعضهم اكثر .. و طبعا تختلف الاسباب .. الحرمه البجر تبا تيلس بيت اهلها عشان امها ولا خواتها يساعدونها بحكم انها اول مره و ما تعرف تتصرف .. بعضهم ما يحبون يتمون زيادة … لنه الحرمة ما تصبر عن ريلها .. و البعض من النساء تقول انه كل اغراضها في بيتها و ما تقدر تيلس تنقل و جي .. فاريح لها هناك ..
انا يلست افكر … انه الحرمة عقب الولادة تحس عمرها مب حلوة جسمها مخترب و يبالها مساجات و سوالف عشان تدخل الكرشة .. و من غير المزاج المتعكر من النفاس و قلة النوم …
حتى اللبس ما يطلع حلو عليها و هي المتعودة انه تكشخ و تتعدل جدام ريلها .. الحين مالها بارض لشي في هالفترة … فكيف تروم تسير بيتها على طول عقب الولاده ؟؟
انا عن نفسي في ولادتي الاولى تميت عند اهلي اكثر عن 40 يوم … لني كنت خايفه ارد بيتي و ما عندي خبرة مع النونو .. بس الحين ان شاء الله اعرف اتعامل مع البيبيز فقلت شهر بس .. او 3 اسابيع .. على حسب كيف الريكافري من الولادة .. لأني ناويه اييب وحده تسويلي مساج و جي و بسوي برامج علاجية للبشرة و جي ..
خلونا ننتناقش ..و نشوووف اراءكم ..
بس راح اتكلم عن حريم العايلة
اختي العودة لما ربت ويابت اول بيبي تمت عندنا تقريبا اسبوعين او 3 وعقب ردت البيت عشان ريلها يستحي يزورها عندنا كل شوي
اما خالاتي وحدة ف بوظبي يوم ربت كانت ساكنة ف بيت زوجها وطبعا ام ريلها هي اللي هتمت فيها وما زالت بس اول 3 عيال لما يابتهم كانت ساكنة ف بيت اهله وعقب بعيالها الباجين ف بيتها وكانت ام زوجها اتيها حليلها
يعني شي طبيعي كانوا عادي يهتمون ف نفسهم عادي
يعني عندي انا احس ان الوحدة تسكن ف بيتها وااايد اريح واحسن من ان تسير بيت اهلها او اهل ريلها
هذا راي انا ^_^
والسموحة ع الاطالة
لانها طول الفتره بيكون ويها شاحب وتعبان من الرضاعة والسهر ، هذا من غير انها تشرب اشيا حارة مثل الحلبة و اعشاب النفاس اللي تطلع ريحة مو طيبة ، غير ان هرموناتها مش متزنه فتعصب بدون سبب ههههه
انا بصراحة يوم بربي ان شا الله بقعد بيت امي شهرين مو بس 40 يوم وارجع لبيتي وانا عروس *
بس الحمله الثالثه في بيتي والله رووووعه الصراحه تحسين حتى ريلج مستانس ويتنقز وفرحان بالبيبي وخاصه اني في بيت بروحي فمرتاحه وعيالي في غرفهم
واحين البيبي الرابع في الطريج وعلى وشك ولاده يوم يومين بالكثير وطبعا بيلس ويا بوالشباب وهو ماخذ اجازه عشان ييلس وياي
طبعا جهزت لي كل شي يديد جلابيات بجايم قمصان نوم تيشيرتات بناطلين بكشخ وبدلع
واتمنى تدعولي الله يسهل علي
عقب خلاص بيت ريلج ع طول بالعكس يستانس الريال ويوم هو ف الدوام ترومين تهتمين ف نفسج
رغم اني بس تميت اسبوعين
وندمت هههههههه لانه كان وضعي وحالتي معتفسة والبيبي والكرششة وووالخ
اما بيت اهلي مرتاحة ويساعدوني بس بنفس الوقت ريلي كان يستحي يزورنا كل يوم عسب يشوف البيبي
وهذا من الاسباب اللي خلتني اروح البيت من غير انه اغراضي كلها في بيت ريلي والسرير وووالخ
عيل تعرفون نحن لآزم الحرمه مآتطلع من بيت ريلهــآ فالأربعين
مآدري اذا حد نفسنــآ !