الى كل ام و كل اخت و كل السيدات احذروا الصياني الستيل جدا جدا جدا سياحة الامارات

حبيت اشارككم بموضوع هاااااااااااااااااااااااااااااااااااااااااام جدا جدا جدا مع العلم بانه يمكن يكون الموضوع انطرح قبل بس و الله العالم اني ما قرأت في المدونة مثل هذا الموضوع لانه صار معي انا و بالذات مع فلذة كبدي ولدي اللي بعده ما كمل السنه و عمره 11 شهر السالفه و ما فيها الله يسلمكم من اسبوعين او ثلاث سمعت انه بشكارة اختي كانت موجوده في بيت امي اتغسل صينيه من صواني الستيل و يا مكثرهن عند امي و ما نحتاي لا انا و لا خواتي نشتري من السوق اذا بغينا خذنا من عند امي وحده المهم انه الصينيه حوافها حاده جدا مثل السكين و اغلب الصياني اذا مب كلهن بنفس الطريقه و طاحت الصينيه و قصت صبع البشكاره بس طبعا انقص شويه يعني مب وايد و الاسبوع اللي طاف حصلت الكارثه الكبرى اللي عمري و في حياتي ما بنساها و لا بنسى المشهد اللي حصل حق ولدي فديت روحه كنت في بيت امي و عندي ولدي الكبير الله يخليه توني امدخلتنه الروضه يعني روضه اولى و اول مره يطلبون منه نشاط و كنت مشغوله ادور له صور حق النشاط في الغرفه الي مثل ستور صغير بس داخل البيت و عادي اليهال دوم يلعبون في هاي الغرفه المهم انه في كبت كبير و بين الكبت و الجدار فراغ صغير و في صينيه من الصواني الستيل الي الله لا يكثرهن ان شاء الله في كل بيت وو لدي الصغير يحبي و سار عند الصينيه فخذته و طلعته برع الغرفه و عندي بشكاره يديده اثيوبيه طمه ما تفهم شيء ابدا و كملت شهر من يبتها و ان شاء الله بغيرها جريب .
و هي قايليلها في المكتب انه تنتبه على اليهال مع اني و الله ما اعتمد على البشكاره و اهد عيالي عندها اللهم يوم اسير بيت امي لانه ما شاء الله البيت عود و اليهال يحبون يلعبون في الحوي و ما يقرون داخل البيت اباها بس اطالعهم المهم طلعت ولدي على اساس انها اتشوفه حبى شوي بعيد عن االستور و سارت وراه و يابته و حطته والله ما اذكر انها حطته في الستور و الا بروحه دخل و هي على طول سارت و يلست في مكانها اتطالع التلفزيون و انا مشغوله ادور الصور و عاطيه ظهري حق ولدي حتى ما انتبهت انه عندي و الا اسمع صرخته و على طول شليته و شفت دم على الارضيه لانها كانت كاشي مب زوليه و لا سيراميك طالعت ويهه مافيه شيء لاني توقعت الدم من خشمه و يلست ادور في ريوله ما شيء من وييييييييييييين و كانت الصاعقه عليه يوم شفت صبع ايده الصغير متدلي قعدت اصارخ و الحمدلله انه اختي كانت موجوده لانه هذاك اليوم محد في البيت غيري انا و اختي كانت توها يايه من الدوام على طول يتني و انا مب عارفه شو اسوي و البشكاره طبعا عقب ما شافتني يت و الا ما بتتحرك من مكانها خذت كلينكس و حطيته على صبعه و اقول حق اختي صبعه انقص و ما ادري عن الحاله اللي كنت فيها ابغي اصيح و ابغي اصارخ و ابغي اكفخ البشكاره من الحره اللي فيني لانها موووووووووووووووول مب مهتمه و دوم ولدي يحط نعول و الا اي شيء جدامه ما تتحرك من مكانها انا اللي اركض و آخذ عنه كل شيء المهم قعدت ادعي عليها و العنها و اقول كل اللي في خاطري من الحره لاني مب حاسه باللي اقوله او اسويه و نفس الوقت البس عباتي لانها الحمدلله كانت جدامي في الصاله و الله ستر و ما طلعت من البيت مكشفه المهم خذته على مستشفى الامارات في دبي لاني اعالج عيالي عندهم و جريب من البيت وديته على طول الطواري شافوه و خافوا من الشكل و على طول زقروا الدكتور و اول ما شافه قالي وديه على طول مستشفى راشد و انا طبعا هذاك الوقت كنت اصيح و الله العالم بحالتي و اتصل على ريلي لاني كنت خايفه اسير بروحي و اختي طبعا خوافه اكثر مني المهم وديته مستشفى راشد قسم الحوادث و هناك الواحد في حاله لا يرثى لها و هم قاعدين و اعصابهم بارده مثل الثلج و يوم شافه الدكتور طرشنا على طول الاشعه لانه قال يمكن يكون فيه كسر بس الحمدلله رب العالمين احمدك ياربي و اشكرك على النعمه اللي عطيتها لولدي لانه صبعه مافيه كسر بس الظفر طبعا كله طاح و شوي من الجلد المهم لزقه الدكتور بماده مثل الصمغ السائل لانه ما يستوي ايخيطه و قال عقب خمس ايام انشاء الله انتي شلي الشاش من على صبعه و ان شاء الله يلزق قلت يعني ما اوديه العياده عشان ايشلونه قال ما يحتاي شليه بروحج يا قوة قلبي اذا شليته سألت النيرس فقالت وديه العياده اللي عدالكم و بيشلونه و بعدها رجعت لبيت امي و شوي يتني اختي اتقولي انه صبعه ينزف و الشاش كله دم لانه فديته كله يدق ايده على الطاوله يلعب قلت يمكن انه عادي المهم ثاني يوم وديته العياده اللي عدال البيت على اساس يغيرون الشاش و طلبوا مني البطاقه الصفراء اللي المفروض يعطوني اياها مستشفى راشد عشان التغيير و طبعا ما عطوني شيء هناك لانه الدكتور شكله مب متفيج حق شيء هذاك الوقت و حولوني على الدكتور اللي في العياده و طبعا يلس يسألني عن الي استوى و انا اشرح له و قالي المفروض يعطونج البطاقه اوكي ما عطوني شو اسوي قالي انصحج اتردين حقهم هناك يكون افضل لانه يمكن استوى شيء حق صبعه و طلعت من العياده و وديته مستشفى راشد و سيري يمين يسار لين ما شفت اللي بيغيرله و طبعا النيرس بس هالمره كان ريال و قعد يبطل الشاش و هو لازق و انا على اعصابي وو لدي يصيح و كل ما اوديه عند حد يسالون شو اللي استوي و طبعا اقوللهم صينيه ستيل قصت صبعه او بالاحرى قطعت صبعه المهم اول ما فتح الشاش طاحت القطعه اللي كانت معلقه و لزقها الدكتور في هذاك الوقت انا شفت القطعه اللي هي الظفر ما شيء دارت فيني الدنيا و حسيت اني بغيب عن الوعي بس الحمدلله اني كنت يالسه على الكرسي و وقتها يأ دكتور عند الممرض يطلب منه يشوف مريض و الممرض كلم الدكتور عشان يشوف ولدي و يوم شافه قاله حوله على نفس القسم مال البارحه و على طول اتصلت في ريلي و قلتله تعال لاني مب قادره اتحرك من الصدمه و سرت القسم الثاني و نقعوني لين ما شفت الدكتور و طلع احسن عن الباكستاني اللي لزق الصبع و قال خلاص ما شيء فايده من التلزيق و ان شاء الله بيطلع الظفر و بيرد الصبع مثل ما كان بس حطاله كريم و لف الصبع و قالي غيريله كل يوم في العياده لمدة اسبوعين و طبعا عطاني البطاقه الصفراء لانه مستحيل ايغيروله من دون البطاقه و طاف الاسبوع الاول و ان شاء الله يعدي الاسبوع الثاني على خير …

فالله يخليكم كل وحده اتسير و اتطلع الصياني الستيل و اطالع حوافها اذا حاده عقيها او سويلها لحام عشان ما تستوي حاده و تجرح لانه اذا فات الفوت ما ينفع الصوت