المعكرونة الصينية .. تاكلوا أصابع ايدكم وراها ( بالخطوات والصور) من مطبخي

اليوم سويت المعكرونة الصينية بالصلصة الحلوة ،، والله تاكلوا اصابع ايدكم وراها ..

المعكرونة الصينية تتميز بكثرة كمية الخضرة ،، يعني كل ما زدتي كل ما كان طعمه أحلى ..

ما ابي منكم غير دعوة صادقة ومن القلب بالتوفيق والهداية وأن الله يحقق لي اللي في بالي ويسدد خطاي ..

وادعوا أن الله ينور قبر أبوي ويكون قبره روضة من رياض الجنة .. اللهــــم آميــــن ..

نبدأ بالمقادير:
أنا سويت 2 كيس معكرونة يعني هاذي مقادير 2 كيس وإذا حبيتوا تسووا كيس واحد سووا من كل شي نص الكمية
2 صحن (450جم ) صدور دجاج مخلي من العظم مقطع صغار ..
3 بصل مقطع شرائح ..
4 فلفل أخضر حلو مقطع شرائح طويلة ..
2 جزر مقطع شرائح طويلة ..
2 علبة فطر مقطع ..
4 مكعبات ماجي ..

صلصة الصويا الحلوة ..
2 ملعقة طعام نشا مذاب في 2 كوب ماء ..
2 كيس معكرونة اسباغيتي
فلفل أسود مطحون ( نسيت اصوره)

الطريقة :
نسلق المعكرونة مع أضافة ملح وزيت إلى الماء وبعدين نصفيه ونصب عليه ماي بارد عشان ما يلصق في بعض

يحمر البصل

ثم نضيف الفلفل البارد والجزر ويحرك ويترك على النار حتى يذبل الفلفل والجزر

يضاف الدجاج ويقلب حتى ينضج الدجاج

يخلط مع بعض ويستوي مثل اللي بالصورة

تضاف صلصة الصويا الحلوة والكمية على حسب الرغبة ( أنا تقريبا احط ثلث الغرشة على 2 كيس معكرونة )

يضاف النشا المذاب في الماء ويخلط الجميع

نضيف المعكرونة ونقلب الجميع

ملاحظة هامة: المعكرونة ما يدخل فيها الملح إلا في ماي السلق ،، وبالنسبة للي ما تحب المذاق الحلو تقدر تبدل صلصة الصويا الحلوة بالمالحة مع مراعاة تقليل الماجي لأن بيطلع مالح شوي ..

وهذا الصحن للي تدعي لي وتدعي حق أبوي الله يرحمه