من دون مبالغة ,, الذ خبيص ممكن تجربينه
تابعيني و شوفي المقادير و الصور
المقادير :
كوبين طحين رقم 2
كوب سكر
كوب ماي
كوب زيت
ربع كوب ماي ورد منقوع فيه زعفران
طريقة التحضير :
نييب جدرين ع النار
جدر نحط فيه الطحين ونحركه على نار هادية ,, لين ماتشمين ريحته و سكري عنه النار
( كنت يالسه اصور و نسيت الخاشوقه و احترقت وقت التصوير لان الجدر كان وايد حار ههههه )
والجدر الثاني نحطه ع النار و نييب قلاص السكر و نحطه في الجدر على نار هادية لين مايذوب السكر شوي شوي
حركيه بين فترة و فترة ,,عن يحترق السكر
نبا اللون يصير لونه عسلي وسط ,,لا غامج و لا فاتح
الحين بنشيله من ع النار ونضيف له الزعفران و الماي ورد + قلاص الماي
صبيهم شوي شوي ,, لانج بتشوفينه يفووووور بشكل قوى ,, و السكر يتجمد و يتكتل
لاتحاتين مع التحريك بيذوب و بيرجع طبيعي
حركية بسرعه و ردي حطيه ع النار لين مايذوب كل كتل السكر
وبيصير عندج مثل هذه الشيره ,, ماراح تكون ثجيله نسكر النار و نخليه خلاص على جنب
نرجع للطحين اللي حمرناه شوي ع النار
بننخله ,,لانه بعد التحمير يتكتل و يصير فيه دوائر دوائر
لاحظي الصور
قبل
بعد
,,
اذا وصلنا لهالمرحله ,,بنييب جدر نظيف
ونحط فيه قلاص الزيت ,,,
يتبع
راح يفور في البداية
حركيه على حراره هادية باستمرار لين مايصير مايغمج لونه
ويصير لونه جي
( اذا تحبين الخبيصه لونها غامج ,, حمريه اكثر )
نشيل الجدر من ع النار ونظيف له الشيره و نحرك بسرعه عن يتكتل
في ناس يحبون يصيفون له حبة الحلوة , لكني احبه بهالطريقة العادية
رجعيه ع النار و حركية دقيقتين ثلاث فقط
لا تتركينه اكثر عن ينشف
وهاي النتيجه
صدقووووني لذيذ لاقصى حد
والخطوات بسيطه
ماعليكم من الصور
انا حاولت اصور كل الخطوات عسب يكون الموضوع متكامل فقط
لكن التطبيق وايد بسيط و مايباله عباله
وع الطبيعه اللون اغمج ,,لكن مع الفلاش الكاميرة يبين لونه فاتح
وهذا الصحن بعد مازينته بالجوز
شرايكم ؟؟؟
ولا تنسوني من صالح الدعاء
بس نحنا نسميها عصيده 