الايلس او الفاونديشن تعليم الامارات

السلام عليكم .

عندي شي امحيرني ، ما اعرف شو الاحسن ابدا ادرس فاونديشن في كلية التقنيه ومن امتحان السيبا بكون فالمستوى الثاني
او اني اوقف الكورس هذا وادرس ايلس .
واللي تنصحني ادرس ايلس هل تعرف معلمة ممتازة في ابوظبي و معهد يساعدني خلال 4 شهور ابغا اكون توب توب واييب 5 ونص . يا ليت اللي عندها خبره ما تقصر في معلوماتها

مادري والله ياختي بروحي موقفه دراسة التقنيه من سنه
بس بخبرج باللي اعرفه المستوى الثاني يعني بتدرسين الفاونديشن سنه ونص اذا نجحتي في كل اللفلات ولازم تنجين ف الايلس عسب تدخلين التخصص
والايلس يمدحون دراسة معهد برتش كانسل في ف بوظبي ودبي وشارجه بس طبعا انتي بتروحين الفرع اللي ف بوظبي وهم بروحهم يمتحنونج هناك وشهادتهم زينه

اللهم يوفقج اختى ياليت حد ينصحنا وين ندرس الايلتس؟

حبيبتي ادرسي فاونديشن وآيلتس في نفس الوقت اذا تقدرين …
ودراسة الايلتس افضل من الفاونديشن لانه سنوات الدراسة اقل …
وصلي استخارة ماخاب من استخار

أنصحج تاخذين الفاونديشن < انا خريجة من التقنية
الفاونديشن ( لو مثلنا لول )
بتدرسين فيه إنجليزي <- و مفيد جداً و على اسلوب الايلز و تمارين عليه
+ بتتعلمين على نظام الكلية + كيفية كتابة البحوث و استعمال البرامج الاساسية ..
و تقدرين تمتحنين الايلز اي وقت قبل ما تخلصين الفاونديشن لان اساساً الكلية بتعطيج الفرصة تمتحنين ( على ايامنا فرصتين مجانيات وعقب كل امتحان بـ850 اعتقد ) من غير التدريبات الى بتحصلينها ^^
و ترا الـ5.5 مقدور عليها وانا الحمدلله استاذنا كان توب توب .. خلال سمستر واحد رفعت مستواي من باند 4 لين 6.5 وهي اول سنة فاونديشن

جزاكن الله خيرك واشكر كل وحده ردت علي وريحتني
وبتوكل على الله وبدرس فالكليه ومنها بدرس ايلس والله يسهلها

حبيبتي ماله داعي توقفين دراستج. حرام يضيع عليج سمستر. ادرسي فاونديشن و ايلس نفس الوقت. والدراسة بتقوي لغتج للايلس.

الله يوفقج