بما أني عروس حالي من حالكم و أفكر فموضوع الزهبة هالأمور فحبيت أقترح عليكم شي بيفور على المعرس المسكين مبلغ كبير من المال و بيرتاح من ديون و سلفيات را تعرقل حياتكم فلمستقبل
الموضوع هو يتعلق بالزهبة
بصراحة أنا وايد شايفة أنه الناس تبالغ بالزهبة و في النهاية كله ينفر في الزبالة و هذا تبذير و التبذير حرام
بعطيكم مخططي اللي أنا ناوية أسويه و طبعا أدري مستوى ريلي المادي يختلف عن مستوى رياييلكم بحكم أنه ريال على قد حاله و معتمد على نفسه مب على أهله فلازم أحاول أوفر عليه مسكين فديته حبيبي و أتمنى خطتي تستفيد منها البنات اللي ماخذات رياييل على قد حالهم و البنات اللي ما يحبون يبالغن
عروستنا الغالية ترا الموضة تتغير و زهبتج لو بالغتي فيها تراج بتملين منها فليش ما تاخذين لج أغراض بعدد معقول عشان عقب شهر و لا شهرين من العرس تغيرين و تاخذين زيادة
طبعا يا عروستنا الغالية ما عليج من رمسة الناس فريها بحر لأنه هذه حياتج أنتي و ريلج و أنتي بتتزوجين ريلج ما بتتزوجين الناس
المهم بعطيج المخطط عشان لا تبالغين و يكون سعر زهتبج معقول لأن جد الحياة صارت غالية و الريال وراه بيت و راه مسؤوليات ثانية و محتاج يفكر فباجر لما بيسوي لج بيت يضمج و يضم عيالج صح و لا أنا غلطانة؟
المهم تفضلي يا عروستنا الحلوة المخطط و الميزانية اللي أنا بتبعها و أتمنى إنج تستفيدين منها و طبعا المخطط ما يشمل طقم العرس.
قمصان النوم:
١٠ قمصان نوم راح تكفيج و خلينا نقول قمصان النوم سعرها بيكون بين ال ٣٠٠ و ال٥٠٠ يعني قمصان النوم راح تكلفج ٥٠٠٠ درهم
٥ أطقم ذهب بسيطة راح تكفيج و بما أني باخذ عيار ١٨ و أبيض لأن ما أحب الأصفر فخلينا نحسب سعر الذهب و هو اليوم فحدود ١٢٠ درهم لعيار ١٨ و أنا مثلا باخذ ٥ أطقم كل واحد خلينا نقول ٢٠ جرام. فلبداية بنضرب ١٢٠ في ٢٠ بيطلع ٢٤٠٠ و مع سعر المصنعية خلينا تقول ٢٦٠٠ بس طبعا أنتي بشطارتج ترومين تكاسرين وي راع المحل لكن حطي فبالج ما بيرخصه أقل عن ٢٤٠٠ اللي هو سعره بدون المصنعية
و ضربي ٢٦٠٠ في ٥ بيطلع ١٣ ألف درهم و بصراحة سعر حلو
و على فكرة يا بنات ترا وايد محلات ذهب يقصون عليكم و يبيون اغلى عن السعر بوااااااايد فقبل لا تروحين محل الذهب شوفي أسعار الذهب بلعيارات و حفظيها و خلي راع المحل يقيس الوزن يدامج و أتي حسبي عان لا حاول يرفع السعر عليج تقفطينه و أنا وحدة أسوي جذي بصراحة و يطلع علي بسعر أوكي
و بالنسبة لفستان العرس خلينا نقول ١٠ آلاف درهم بلكثير و لا تبالغين و لو في مجال تحصلين أرخص بعد يكون أحسن و أنا أعرف ناس يأجرون على ٤ و ٥ و ناوية آخذ من عندهم إن شالله
و نعال العروس تكرمين ٥٠٠ درهم لا أكثر
و بالنسبة للشيل و العبي ١٠ راح يكفونج و خلينا نقول كل عباة ٧٠٠ درهم يعني كله ٧٠٠٠ درهم
و النعلان و الشنط ما شالله يعني مافي بنت ما عندها هالسوالف و أكيد كل وحدة فينا كل شهر تتسوق و تاخذ لها شنط و نعلان يديدة فليش بعد ناخذ أشيا يديدة حق الزهبة صح و لا غلط؟
و بالنسبة للمخورات فلبداية سوي لج ٥ و لا تسوين شي غالي و في خياييط يسون لج الوحدة على ٥٠٠ و طبعا مع قيمة القماش و الخياطة بيطلع عليج ٦٠٠٠ درهم
و البجامات بسج ٥ و خلينا نقول الوحدة ٢٠٠ درهم يعني ١٠٠٠ راح تكفيج إن شالله
و بالنسبة للتسريحة و المكياج لو أنتي تشتغلين تكفلي بهم بنفسج عشان تكبرين فعين ريج و يحس أنج واقفة معاه و بيفرح و لو ما تشتغلين حاولي تيمعين من مصروفج مثل ما هو مسكين يمع من معاشه و تعبه عشان يتزوجج و تدفعين اللي تقدرين عليه و الباجي هو يدفعه و طبعا أكيد بيفرح الريال إن شالله
و أشوف هالزهبة بصراحة معقولة و مش مبالغ فيها و لو جمعنا كل البيزات بيطلع ٤٢ ألف درهم و مبلغ معقول و غير مبالغ فيه و خلينا نقول مهرج ٢٠ ألف يعني بيكون عندج ٦٢ ألف و بصراحة مبلغ معقول و لو زاد من عندج ساعدي ريلج فلعرس لأنج زوجته و محتاج لج توقفين معاه
و أتمنى أنكم استفدتوا من موضوعي و بنات ما عليكم من الناس اللي تقول لازم تطلبين فوق المية ألف و مادري شنو و الله هاي كلها خرابيط و مبالغات و تبذير أهم شي سوي اللي أتي مقتنعة فيه مب اللي الناس تقترحه عليج.
اصلان بتلوع جبودنا من الثياب ومعضم ثيابنها هو هب شايفنها فيعني عادي لو نلبسهن
شعور طيب منج ربي يووفقج
ويسعدج معا ريلج
المشاركة الأصلية كتبت بواسطة أخت_القمر 
اصلان بتلوع جبودنا من الثياب ومعضم ثيابنها هو هب شايفنها فيعني عادي لو نلبسهن
تسلمين حبيبتي على مرورج الطيب و كلامج صحيح
المشاركة الأصلية كتبت بواسطة زم_قمر_ان شعور طيب منج ربي يووفقج
ويسعدج معا ريلج
آمين يا رب
و يسعد الجميع و يرزق كل محروم
المشاركة الأصلية كتبت بواسطة malak_AD هيه صح كلامج و بصراحة البعض يبالغ في أسعاره
بس في منهم مكياجهم حلو و أسعارهم معقولة