رجعنا بعد انقطاع
اليوم حابة اشارككم طريقتي في صناعة بليتات المكياج
الكلام كثير بالميكاج من ضمنها بلتات المكياج بعد ما الكل صار يتجهه للبليتات لأسباب كثيرة منها:
1- توفر المكان والحيز وهاي مشكلتي الأبدية ماشاءالله بالذات للناس الي عندهم كميات كبيره من المكياج
2- طريقة عملية جدا لحفظ المكياج
3- ترتب مكياجج بطريقة حلوة وعملية
4- ممكن تقسمين مكياجج في كل بلتة على حسب النوع او اللون او طريقة الاستخدام يعني مثلا تكون بلتة للاي شادوات بألوان معينة او بلتة لمستحضرات ماركات معينة أو بلتة للايشادوات الكريمية او المائية وبلتى للبلاشر والخ الخ الخ انتي وترتيبج عاد
البلتات تختلف من ماركة لاخرى وتختلف باحجامها وانواعها ووزنها بالنسبة لي البلتات الي أحبها وأفضها تكون بالمميزات التالية:
1- خفيفة الوزن
2- غير قابلة للكسر
3- تحافظ على المكياج يعني ما افضل البلتات الي مافيها كوشينج يعني اذا طاحت البلته انسي البلته بالي فيها لانه كل شي راح يتنعنع داخلها
4- حجم مناسب وما تقيدني بشكل أو حجم الاي شادو يعني احبها فاضية من داخل عشان أحط الاي شادو مربع والا مستطيل والا دواؤي وبكل الأحجام ما اتقيم بحجم وشكل معين
5- أفضلها من غير مراية لانها تتكسر ولها وزنها
6- أههههههههههههههم شي تكون ممغنطة يعني ألصق على الاي شادو مغناطيس والصقه على البلته
وأحلى شي بهالموضوع أنه راح نصنع بلتة بأشياء موجودة عندكم في بيوتكم وتكون فيها كل هالمواصفات تصدقون 
قبل كل البلتات ولاتزال معظم الماركات تطلع البلتات البلاستيكية وهاي ما احلها لانها قابلة للكسر وما تحفظ المكياج يعني من تتطيح البلتة لالالالا سمح الله بتتكسر كل اي شادواتج الحين بعض الشركات صاروا يطلعون البلتات الكرتونية لانها أخف وارخص للشركات وعملية اكثر ومحافظة للبيئة أكثر من المنتجات البلاستيكية وتحافظ على مكياجج إذا طاحت لانه الكرتون يمص الصدمات على خلاف البلاستيك الي بيوصل الصدمة لمكياجج
هنا مثال على بعض الشركات إلى تسوي بلتات كرتونية
اريبيندكيه نيكد 1 وشوقر بيلز (راح اسوي ريفيو عن شوقربلز بليز محد يسألني عنها يادوب ألحق على اسئلة البنات الي عندي ^_^)
هني صور لهالبلتات الجميله
خلونا من الكلام ونبدأ
خلونا نبدأ بالخطوات والأدوات المطلوبة كالتالي
بوه أو كرتون أو ورق مقوى يكون فيه عرض نص سم عالاقل
شريط لاصق أسود مبين بالصورة تحصلونه في الجمعية
مسدس الشمع
مقص ومشرط
مسطرة
دفتر كرتون قديم
شريط مغناطيس أو شريحة ممغنطة تحصلونها بالمكاتب انا الي عندي من دايسو شريحة ممغنطة ملونة شي منها ألوان حلوات لكن المغناطيس الي فيها ضعيف يلصق عليه المغناطيس القوي فقط
طبعا الكراسة هي راح تكون البلتة فلازم تختارين الحجم المناسب لج
انا اخترت بلتة تكون صغيره فاخترت نوته صغيره شكلها حلو خذتها من دايسو
أول شي اتيبين الدفتر أو الكراسه القديمة وتقصين الورق الي داخلها بهالشكل
عقب مكان القص اتيبين شريط لاصق أسود أو قطعه جلاد أو اي شي تغطينه فيه انتي وذوقج وابداعج عاد
عقب تقصين البوه المقوة عشان تسوي اطار البلته فما تعرضينه وايد خليه نص سم بس وتقايسين وتقيسين على حواف النوتة او الدفتر مالج
هذا القياس مالي
عقب تلصقين البوردات مع بعضهم ويطلع لج البرواز كالتالي
تااااابع
وعقب تبدين تجلدين أو تغلفين البرواز ولازم تنتبهين تخلين مكان تحطين مغناطيسة عشان تتسكر البلته بمغناطيس
هذا البرواز بعد التجليد
وهنا تقصين شريحة المغناطيس عشان تلصقينه تحت على الكراسة وعقب فوقة البراوز كالتالي
عقب تلصقين قطعة مغناطيس مكان ما تتسكر البلته والشكل النهائي كالتالي
وهني بلتاتي الي سويتهم بنفسي
هني كيف المكياج يلصق على الشريحة الممغنطة من غير ما يطيح
ممكن تحطيم مراية مثل ما سويت في البلته السودة
ولو الدفتر مالج عليه رسومات ماحلوة تقدرين تجلدينه كامل مثل البلته السودة جلدته كامل وعقب زركشته على ذوقي
ان شاءالله يعيبكم الموضوع
المشرفات بليز لاحد ينقل الموضوع خلوا الموضوع هنا والي يبا يحط كوبي منه في قسم الحرفيات (معرف شو اسمه الي يسوون فيه شغل ايدهم) ودوه بس خلوه بهالقسم لو سمحتوا ^_^
بليز بنات الفكرة فكرتي والموضوع من شغل ايدي إلي حاب ينقل الموضوع أكيد عادي لكن بذكر المصدر
والي بتطبق بليز راوونا شغلكم وانتاجكم ^_^
دعوة لي تكفيني ^_^
اتولهت على مواضيعج
تسلم يمناج وربي يوفقج الغاليه
بانتظار مزيد من الافكار ويعطيج العافيه
جـد مبدعــة
حبيـت الفكـرة وايـد