مرحبا خواتي شحالكن ..؟
اريد طريقة مكرونه بالربيان ..<< وياليت اتكون المقادير لشخصين
انا ماخذه ربيان صغير مجمد امريكانا .. وعندي بهارات الروبيان استخدمها والا ..؟
وبالنسبه للصلصه عندي الجاهزه .. تنفع والا لازم انا اسوي الصلصه بروحي ..؟؟
وهذي اول مره اسوي ربيان ان شاء الله تضبط عندي 
انا عن نفسي اسويه بالاندومي يطلع وااو بس احبه سبايسي و تقدرين اتغيرين بالاسباقيتي
اولا افور الاندومي او السباقيتي في ماي و ملح مع زيت و اخليه .
فهالوقت اكون مجهزه بصله صغيره و طماط مضروب بالخلاط بدون الجلد( انقعه في ماي حار عشان يسهل علي النزع) و بهارات من الي اتحبين، انا احط مكعب ماجي و فلفل اسود و صلصه حاره.
ايب التاوه اقلي البصل ، بعدين اضيف الربيان(طبعا اكون مغسلته ويكون مب مجمد) و اخليه مع البصل ٤ دقايق بعدين اصب عليه عصير الطماط الي ضربناه فالخلاط و اضيف البهارات و اسكر عليه اخلييه يفور عشان ينضج معاج الربيان. يوم اتحسين انه نضج يعني بعد ١٠ دقايق ، صفي المكرونه من الماي و رجعيها فنفس الجدر و صبي عليها الخلطه .
و بالعاافيه . *
استغفر الله الذي لا اله الا هو الحي القيوم واتوب اليه
انا اجيب بصله صغيره وحبتين ثوم وافرمهم احطهم في زيت بارد واقلبهم الان ما يحمروا واحط فلفل احمر وكركر واحركهم بعدين ملعقتين صلصة طماطم واقلبها الان ما الصلصه تفصل عن الزيت واحط عليهم طماطمتين وسط اكون شويتها على النار مباشره وفرمتها واقلب واحط كمون وكزبرة مطحونة واخليها الان ما تتسبك احط الروبيان واقلب
وترى الروبيان ما ياخذ وقت بعد ما يلتف على نفسه خمس دقايق تكفي وحطي عليه المعكرونة الي تبيها وقدميها
نصيحة
اتاكدي ان الروبيان من ظهره من فوق ما في خط اسود واذا في شيليه لان بيخلي طعم الاكل مر
لا تطبخي الروبيان زياده عن اللزوم ترى بيصير قاسي
المعكرونة لمن يبالها خمس دقايق وتنضج او اقل صفيها وحطيها على الروبيان وخليها تنضج معاه المعكرونة بتاخذ من الطعم وبتصير احلى
ان شاء الله اكون افدتك