أطلب النصيحة والآخرين يتعلمون من تجربتي معاهم دليل العروس

اشتريت أثاث من محل في بوادي مول في العين وهو محل ميزون دي رمال بست وثلاثين ألف وشوية وكان الاتفاق معاهم إنهم يصنعون الأثاث لي في لبنان عبارة عن طقم كراسي وطاولات بعد ما استلمت منهم الأثاث هذا بعد مماطلة منهم الأثاث صار فيه تشققات بالضبط بعد خمس شهور من الاستلام مع إني محافظه على الأثاث المكيفات شغاله ولما نطلع من البيت نغطيه بشراشف بيض ولا أخلي عيالي يجلسون عليه و نحن في الأساس كعائلة مب ساكنين في البيت فقط نسكنه في الإجازات الأسبوعية والإجازات الطويلة زوجي فقط هو اللي موجود في البيت وعيالي تقريبا كبار يعني ما عندي أطفال يلعبون أو يخيسون الأثاث المهم اتصلت فيهم خبرتهم صاحبة المحل سوت عمرها منصدمة. المهم طنشتني ما رديت على اشتكيت عند حماية المستهلم بعدها أخذوا الأثاث علشان يصلحونه وكل مرة اسير أشوفه عندهم يكون الأثاث مازال فيه عيوب واطلب يصلحونه مرة ثانية الحين صاروا مصلحين ثلاث مرات طلبت منهم يعطوني ضمان على الأثاث وهذا اللي خبروني به حماية المستهلك إن لازم تأخذون ضمان على الأثاث المهم الحين هم يماطلون ما يبغون يعطوني ضمان والأثاث صار له شهرين تقريبا عندهم وحماية المستهلك قالوا لي إذا ما اتفقت معاهم بيحولون الموضوع على المحكمة ما أعرف شو اسوي وياهم. بعد الموضوع حطيته لكم علشان الناس تستفيد من تجربتي وياهم.

الله يعينك اختي فيه ناس يسوون شغل بلا اخلاص في عملهم ربي بياخذ حقك منهم

الله يعوضك خير اختي تابعي الموضوع ولاتسمحين في حقك، مايخافون الله كله من اجل الفلوس لاحول ولاقوة الا بالله
الغش صار مثل شرب الماء

حاولي معاهم يبدلونه باخر من حقك تطلبي لانك دفعتي فلوس
بالتوفيق اختي

المحلات وقت ما تشترى منهم محد احسن منهم بس لما تلاقي عيوب بالبضاعة وتبي تردها بياكلوك كأنهم متصدقين عليك مب كأنك دافع فلوس عليها

الحل خدمة المستهلك تتصل وتاخذ الاجراء

شكرا لكم على تعاطفكم بس أبغي الناس اللي في العين يتحذرون من المحل وإذا حد سوا عندهم يصر على مسألة الضمان لأن بصراحة بعد ما تعاملت معاهم لا يمكن أني بعد أرد أشتري من عندهم. الحمدالله وكلت الله عليهم وفوضت أمري وياهم إلى الله بس خل الناس تتحذر منهم

والله ما أعرف شو سالفة حماية المستهلك أنا بلغتهم وبصراحة هم تواصلوا معاهم على طول بس الحين أشوفوهم منطنشين الموضوع ومنطنشين حماية المستهلك صاحبة المحل تقول لحماية المستهلك إنها بترجع لإدارة الشركة في موضوع الضمان وبترد عليهم والحين هذا الكلام صار له أكثر من أسبوع وما ردت. المهم هي أبدا ما ترضى تكلمني كله تخلي الفلبينية المسكينة اللي عندها في المحل تتواصل وياي بعد اللي صار.