مدرسة الاتحاد بوظبي – الزي تعليم الامارات

مرحبا خواتي

حبيت اسئل عن طلبات مدرسة الاتحاد اللي اببوظبي

بنتي في كي جي 1 ان شاء الله هالسنة

شو اجهز لها من لبس واغراض والخ ؟

بالنسبة للزي ولبس الرياضة

ويزاكن الله خير

أهلين أم فروس ..أنا نفسج.. عيالي kg 1 ف الاتحاد بعد.. فما اعرف كيف لبسهم و لا شو اشتريلهم و خص لبس البنات كيف ؟ يعني اخذلها هيلا هوب و لا دلاغ يكفي.. ما ادري محتارة ..مب مشكله لبس الولد اهون ..و هاي اول تجربه لي فمدارس و حشرة المدارس ..

وهيه بعد ابا اعرف كيف نظام شنط الـ kg ولا بس فايلات نفس الامارات..

يلا انا بعد وياج نتريا (( وليات أمر .. طالبات مدرسه الاتحاد )) ههههههههههه نبا نسوي حزب وياهن

انا اخويه في kg 1 ف الاتحاد بعد

أم التوأمان ..

نفس الاسئلة اللي اببالي والله ..
يالله حزبنا جاهز وبانتظار الامهات

أسعدني مرورج عزيزتي

ام الدانة …
اخوج ياخذ شنطة ولا فايلات ؟

……….انا ماشالله عندي ثلاثة بالاتحاد….اكبرهم بقريد3…..واصغرهم كيجي ون………ولد …المدرسة متعاقدة مع محل ازياء الحسنا بشارع النصر بالخالدية..وهذا رقمهم 6674800…..وهالسنة مريحينا شورتات السباحة يبيعونها عندهم اسعارهم حامضة شوي…بس تفتكين……….بالنسبة للشنط اخذو حق قوم الكيجي شنطتين وحدة صغيرة للنش بوكسو وحدة حق الكتب والملفات..ياخذونها اول الايام لين مايستلمون جميع الكتب وتجلدونها وتردونها….وبعدين ياخذون الشنط الكبيرة يوم الخميس لانه يعطون فايلات الهومورك…والاحد اوريدي لانه بيردونها…….
للاخت اللي عندها بنوتة بالكيجي…اعتقد اللي كنت اشوفهم زلاغات بس حرام الهيلهوب فظيع بهالحر…عالشتا ممكن…
ياليت تخلونا امهات طلاب مدرسة الاتحاد نتواصل وبحاول افتح موضوع عن سلبيات وايجابيات هالمدرسة……..وللامانة مدرسة ممتازة وماعليها كلام بس كم شغلة صارت اتوقع يتلافونها العام القادم…….تحياتي وكل عام وانتم بخير……..

هلا اختي همسه بنفسجيه .. اكيد حياج ويانا في الحزب .. و طلعت انا الوحيدة من العين.. المهم .. انا بسال المدرسه عن الثياب أّذا أييين جاهزات مب تفصيل..

و ع موضوع الشنطه توني شفت ردج .. يا خسارة .. توني رادة من مدينة مدهش

و خذت لهم مناك .. ما طاعوني يصبرون من الفرحة .. خذت لهم لنش بوكس و وياها دبٌة الماي .. والشنطة خذيتها اصغر قياس يعني تشل كتب ..بس مب هذاك الزود .. و خذيت احتياط فايل طبعا لأوراق الـ KG اللي ما تخلص… و القرطاسيه بعدنا

هيه صح اخذ لهم دفاتر.؟ ولا أهم يعطونهم…

و الله مادري احس عمري متلخبطه يمكن لأنه هاذي اول تجربه ليه فالمدارس … انتن نصحني شو لازم اسوي.. و..اللي مب لازم اسويه من كل النواحي ..حتى و كانت ملاحضة صغيره ..

هيه صح يا حزبنا ( حزب مدرسه الاتحاد بكل فروعها) انا وايد تواصلت ويا بنات من المنتدى عن طريق الرسايل الخاصة اسالهن عن مدرسه الاتحاد قبل لا اسجل عيالي فيها .. و وايد مدحنها ليه غير يمكن بس وحده .. و ان شاء الله احطلكن ردودهن اهنيه ..

وشووو بعد… شكلي سولفت عليكن وايد …
يلا اتريا الردود الحلوة منكن ومن صاحبة الموضوع ………..باي

UP ……..UP………….UP

^_*