قصتي مع زواج زوجي الثاني لتربية الطفل

انا تزوجت واحد من بيت يحب التعداد طبعا اكتشفت هالشي بعد فتره زوجي ولله الحمد ما عليه قصور وعمره ما قصر وياي في شي
حتى وانا موظفه بس والله الشاهد علي وعلى كلامي ان ما مخلي علي قصور لا انا ولا عيالي يعني حياتنا ولله الحمد ميسره طبعا لازم
فيه مشاكل وضرابه بس نرد مثل قبل واحسن

المهم ابو زوجي الله يرحمه كان يزوج ويطلق يزوج ويطلق بس عمتي هي الوحيده الثابته في حياته هي الاولى وكان يتزوج وما يكمل سنتين الا
وهو مطلق عمتي كانت تقول لي هو كان جي وكانت تقول كانت موكله امرها لله,,,
اخو زوجي ماخذ ثنتين وطبعا انا للحين في بيت اهل زوجي وكنت اشوف المشاكل واقول الله يستر لين ما طلع الثانيه بيت بروحها
زوجي كله يقول لي انا بزوج انا على بالي يمزح وياي لانه كان مصر علشان ياخذني ووايد صبر لين ما خلصت دراستي ولين ولين
المهم كان يقول بزوج وانا بكل برود اقوله روووووح لاني واثقه ما راح يسويها وعمتي كانت تقول لي لا تشجعينه لانه بسويها قلت لها
وين بسويها ما يقدر اساسا….

في يوم من الايام ياني ومتعدل وكاشخ وانا مستانسه واقول له على وين يقول لي عقب بخبرج المهم راح وكمل تقريبا 5 ساعات ورجع وقال ابي
افاتحج في موضوع قلت له امر قال تراني بتزوج قلت له انت كله تقول بزوج بس ما تقدر وقال لي انا الحين ياي من النظره الشرعيه وانا جي
قلت له احلف وحلف لي والله يا بنات الله سبحانه ربط على قلبي قمت من مكاني ولا كلمته ولا شي هذاك الوقت كانت الساعه 12 بالليل المهم رحت وفرشت لي فراش فالصاله وكنت حابسه دمعتي وهو يقول انتي الاولى وانتي الحبيبه انتي مب مقصره بس هذا شرع الله وانا عندي ميول
واسمحي لي اتزوج لاني ما ابي اظلمج وبكون عادل وياج وانا مطنشه قلت بنام روح الغرفه وخذيت ولدي كان عمره تقريبا سنه (( هالسالفه من 4 سنوات تقريبا))
المهم حاولت ارقد اتقلب يمين يسار ما عرفت انام وتذكرت ان زوجي في نفس اليوم كان مطلع كناديره اليداد من الخياط قلت اكيد مفصل لانه يبي
يعرس وحزتها زوجي راح لامه علشان يقول لها الخبر المهم رحت ونزلت كناديره من الكبت واحرق كندوره كندوره من الغصه الي فيني وانا دموعي اربع اربع دخل وشافني شو قاعده اسوي وما علق وفي ثاني يوم رحت لامه قلت له ولدج يبي يعرس قالت لي انتي الغلطانه كل ما قال بعرس قلتي
له روح وشوفي شو صار الحين قلت لها والحل قالت الحل بايدج وانا رفضت اروح معاه علشان نخطب رسمي لان هم طالبين حضور الام علشان لا
الناس لا ترمس عليهم وعلى فكره البنت كانت طبيبه ومب قاصرها شي جمال ووظيفه بس كانت تبي تعرس وتستر على نفسها المهم بكمل لكم شو
صار

فكرت وفكرت وفكرت وقعدت تقريبا 4 ايام وانا لا ليلي ليل ولا نهاري نهار بس يا بنات والله الشاهد علي من ثاني يوم قمت اادي حقوقي
كزوجه من كوي وغسيل وطباخ وكل شي بس هو يدري اني اسوي كل شي من ورا خاطري واذا قال شي اقول له ان شاء الله وبس ولا حرف
زياده وعقب سبحان الله سويت شي فيها مجازفه لاني ما ادري ان هالشي اذا بكون معاي او بينقلب ضدي توكلت على الله وسويته المهم
هو يحاول يكلمني خامس يوم كلمته عادي قال شو فيج هذا شرع الله ومنو انا او انتي علشان نعترض على شرع الله وانا ما بقصر وياج
وانتي الاولى وانتي وانتي وانا ابتسمت له بس والله من ورا خاطري لان في بالي خطه ولازم اكون طبيعيه المهم وهو نايم سحبت فونه هو
كل الارقام يسجلها بس شكيت في رقم مب مسجل واتصلت عليه وكانت الخطابه قلت له انا اخته وابي رقم العروس لان امي تبي تكلمها بس
بدون ما يعرف اخوي وفعلا عطتني والحمدلله ما قالت لزوجي المهم خذيت الرقم وسجلته عندي وما اتصلت فيها على طول لا اترييت جم من يوم
المهم عقب قلت له ترا العروس بنت يعني تبي ذهب وتبي وتبي ابي يهون بس قال عادي عندي وانا احترق في داخلي عقب قلت له تعال نروح
سوق الذهب نشتري لها شبكه والله والله ما صدق الي يسمعه قال معقوله بتسويها انا هني كبرت في عينه قلت هيه وانا صح مضايجه بس ما بيدي شي غير اتحسب واوكل امري لله ورحنا سوق الذهب اخترت شبكه محترمه وقال خذي لج شي قلت له ما ابي واصر وما طلعت من المحل الا
وانا متزهبه من اول ويديد (( والله كان خاطري اخسره ونجحت الخطه الاولى))
ثاني يوم اتصلت من فون ربيعتي ونحن في الدوام وهزبت البنت هزاب وما خليت كلمه ما قلت لها وعقب عطتني السماعه لامها ونفس الشي
بصراحه ما حشمت احد لا البنت ولا الام وشرشحتهم وسمعتهم كلام سم وعقب اختها طرشت مسج لريلي والله اذا تبا اختي طلق زوجتك هني
ريلي احترق شو اطلقها وما رد اتصل فيها بس طرش لها خل اختكم عندكم وانا عند زوجتي وقال لي هونت قلت له ليش وانا خيفانه ان يقولون له وانا متاكده قالوا له بس ما صدق لان يعرف اني كنت موافقه بالاخير رجع لي بو عيالي + شبكه العروس + الذهب الي اشتريته + التعويض الي حصلته من طلعه وسوق وتغيير جو لان حس ان ظلمني بهالتصرف والحين يوم اسمعه يقول بعرس انقز له ف ويهه واكشر عن انيابي